79歲許冠文獲頒終身成就獎 感謝亡弟許冠英：我好掛住你，多謝你，呢個獎大部分屬於你
79歲的許冠文獲頒第40屆香港電影金像獎「終身成就獎」，他在致辭時感謝家人，並且特別提亡弟許冠英對他的影響，內容充滿思念之情。
許冠文向來擁有「冷面笑匠」之稱，拍過唔少喜劇，代表作有《半斤八兩》、《雞同鴨講》、《一路順風》等等，更憑《摩登保鏢》拿下第一屆香港電影金像獎影帝殊榮。今年獲頒「終身成就獎」，他致辭時表示要多謝幾位貴人，包括導演李翰祥、「電影大亨」鄒文懷，以及3位弟弟許冠武、許冠英同許冠傑。
當中許冠英於2011年許冠英因心臟病發辭世，得年65歲。許冠文致辭時特別提到已故三弟許冠英：「佢哋（3個弟弟）咁多年以來，默默支持住我，因為真係聲都唔敢出，許冠英經常同人講『緊係唔敢出聲，邊敢呀？佢聲大夾惡，又倔強固執，又牙尖嘴利，咪佢講晒囉』。許冠英已經去咗天堂，我知佢今晚一定睇緊，今晚想借呢個機會同佢講，所有你對我嘅批評都係啱嘅，我無咗你真係唔得，我好掛住你，同埋多謝你，呢個獎大部份都係屬於你。」
另外，許冠文又多謝老婆、仔女同埋兩個孫：「我太太係我所有喜劇靈感來源，佢有非常樂觀人生態度，佢認為今日天跌落嚟，聽日都會更好，有時我覺得山窮水盡，我想拍悲劇，佢就會鬧我，使乜你拍悲劇畀我哋睇？呢個現實仲唔夠悲，睇新聞就得，段段都係，我哋戴口罩戴兩年幾喇，你一定要繼續拍喜劇，令香港人就算喊，係笑住喊！提醒香港電影嘅兄弟姊妹，未來日子我哋會面對比較困難時光，我哋千祈唔好怕，我哋明天一定會更好，我哋香港人永遠有種精神，就算我哋喊，都係笑住嚟喊。」