fbpx Web Interstitial Ad Example

【湯水食譜】西洋菜栗子陳腎豬骨湯 清熱潤肺、健脾開胃 (附煲湯小貼士西洋菜唔會苦)

今朝買餸時見到又有靚靚嘅西洋菜即刻心心眼,正當我諗緊煲乜料嘅時候,店姨姨就教我用栗子同陳腎一齊煲,佢話西洋菜同栗子係好夾,煲出嚟啖湯特別甜哦!

西洋菜陳腎栗子豬骨湯

既然店姨姨介紹,我又真係未試過依個配搭,屋企又剛剛入手咗一包陳腎,咁就聽姨姨話試下啦!

西洋菜陳腎栗子豬骨湯-材料

材料:

西洋菜…… 1斤
栗子……… 半磅
陳腎……… 2隻
紅蘿蔔…… 1條
南北杏…… 一湯匙
蜜棗……… 3粒
陳皮……… 一角
豬骨……… 約$45

做法:

1. 西洋菜先用鹽水浸一小時,中途最好換兩次水,因為西洋菜係水種植物,一定要洗乾淨啲呀。

西洋菜陳腎栗子豬骨湯-西洋菜

2. 陳腎浸至軟身後然後切塊。

西洋菜陳腎栗子豬骨湯-陳腎

3. 陳皮浸軟刮去皮瓤。

西洋菜陳腎栗子豬骨湯-陳皮

4. 蜜棗及南北杏浸洗一陣。

西洋菜陳腎栗子豬骨湯-南北杏

5. 紅蘿蔔去皮切塊。

6. 栗子清洗乾淨。

西洋菜陳腎栗子豬骨湯-栗子

7. 豬骨汆水。

西洋菜陳腎栗子豬骨湯-豬骨

8. 煲內放約3L水,隨水加入陳皮。

西洋菜陳腎栗子豬骨湯-煲湯

9. 待水滾後加入所有材料(西洋菜除外)。

西洋菜陳腎栗子豬骨湯-食譜

10. 等再次滾起後,先可入一半的西洋菜。一定要大滾先好加人西洋菜,如果唔係煲出嚟嘅湯就帶點甘苦味呀。

西洋菜陳腎栗子豬骨湯-做法

11. 再次大滾之後,就可以加入餘下的西洋菜。

西洋菜陳腎栗子豬骨湯-去苦味

12. 繼續用大火加蓋煲約30分鐘。

西洋菜陳腎栗子豬骨湯-滾起

13. 之後轉慢火加蓋煲多1.5小時。

西洋菜陳腎栗子豬骨湯-慢火

14. 最後加鹽調味,就可以飲啦!

西洋菜陳腎栗子豬骨湯-調味

千其唔好漏左啲煲湯料,所有湯料都食得,好味之餘仲可以係晚餐諗少一個餸呀!

店姨姨真係無介紹錯,煲出嚟啖湯又真係幾好飲,西洋菜同栗子兩個味又唔會互搶,入口仲好似比其他材料煲嘅西洋菜甜啲添。

以下係各食材嘅功效,可以參考一下呀 (網上資料):

西洋菜 – 有清熱潤肺、助咽喉炎、氣管炎、肺結核、扁桃腺炎及百日咳等的功效。特別屬於燥熱性的咳嗽,療效更為明顯。

栗子 – 有助健脾胃、增進食慾、改善腸道健康及增強扺抗力。

陳腎 – 有養胃生津、消食健脾、潤肺祛燥的作用。

紅蘿蔔 – 具有清熱、解毒、利濕、散瘀、健胃消食、化痰止咳、順氣、利便、生津止渴、補中、安五臟等功能。

陳皮 – 理氣健脾、燥濕化痰。

南北杏 – 可止咳下氣,潤燥消積。

蜜棗 – 止咳潤肺、化痰平喘功效。

溫馨提示:

– 由於個別人仕體質不同,所以大家記得煲之前了解下自己,如有疑問,請先向註冊中醫查詢!

文章獲 小小豬Kinsey 授權轉載

相關閱讀:【湯水食譜】瑤柱南瓜粟米湯 護眼健脾養胃、增強免疫力 瑤柱代替豬肉更香甜