樂齡行山要護腳 揀行山鞋5大要點
退休後愛上行山，正所謂工欲善其事必先利其器，一對合適的行山鞋先可以保護雙腳，令行山變得更輕鬆，繼續去征服香港大大小小山頭。今日就同大家分享揀行山鞋5大要點！
1.輕便為主
行山鞋應以輕便、透氣為主，注意鞋身重量，如果太重的話會造成負擔，反而無法保護雙腳。
2.必須合腳
長時間走路會令雙腳微微發脹，所以選擇尺寸時可以預留約一隻手指的空間，但千祈不要過大，如果行路時有明顯的撞擊聲，代表對鞋尺寸過大或包覆得不夠貼服，導致行路時對鞋無跟上雙腳的動作，長久下來可能會令關節受損。
3.避震鞋墊
崎嶇山路會令雙腳受到衝擊，加上足部脂肪隨住年紀變少，增加雙腳受傷風險，所以揀行山鞋時必須注意鞋墊有無避震功能，以減低行路時的衝擊和負擔，避免受傷。
4.鞋底厚度適中
鞋低太厚會影響腳掌落地時的平衡力，容易扭親；鞋底太薄則會令雙腳疲勞。一般來說，行山鞋最理想的鞋底厚度約24-26 mm。另外，要注意鞋底有無防滑功能，通常鞋底的坑紋愈深，抓地能力愈好，減低跣親的機會。
5.腳踭位要夠硬
腳踭位夠硬，才能減少腳踭落地時的晃動，避免扭到。此外，留意腳踭位有無加厚物料，有的話通常比較不刮腳。