88歲羅蘭姐豁達面對生死：人生真係好難預料，平平安安過一天就算

今年11月，羅蘭姐就踏入88歲。為人豁達的羅蘭姐，從來唔忌諱談論生死，她認為人人終須一生，無人避得過，人生難以預料，無人知道死亡幾時來臨，能夠平平安安過好每一日已經很好。

今年4月曾江猝逝，同曾江相識起過半世紀的羅蘭姐起初難以置信，指自己年前遇見曾江時對方仲係好健壯，講話大大聲唔覺有病。面對曾江突然離世，羅蘭姐感觸地說：「自己都88歲，人生真係好難預料，平平安安過一天就算。」

羅蘭姐-生死

羅蘭姐幾年前為生死教育活動宣傳時，曾經談到對死亡的睇法，當時她說：「人始終逃不過死亡，每個人都係，到最後始終要離開。」

她也曾幻想過離世的情景，坦言希望在睡夢中舒舒服服地離開，「如果你問我，我當然希望在最後一刻，或者最後一刻前唔好辛苦，好似瞓覺瞓住離開就最好。」

身為天主教徒的她，有時會同神講，希望神可以讓她在3日內離開，點解係3日呢？「因為響第一日，身體唔舒服，要送入院第二日，對我們天主教徒來說，最重要係領聖體，領了聖體後，就像有耶穌在這裡保守住，好安樂。到第三日，一直瞓覺安詳地回到天父身邊，咁就最好了，咁就唔使害怕死亡了。」

活了88年的羅蘭姐認為生命係非常矜貴，「你睇下有些人想延續生命都唔得，咁點解我們有生命的時候，不好好去保存？要愛護你的生命、珍惜你的生命。」