「不老童顏」49歲葉蘊儀 唔追求凍齡只想優雅地變老：唔需要刻意搞到好似細個嗰時咁
葉蘊儀最近響電影《正義迴廊》飾演陪審團之一，係一名退休教師兼家庭主婦，久久未有出現幕前的她，演出叫人感到驚喜。今年49歲的葉蘊儀向來有「不老童顏」之稱，不過原來她本人其實唔係太在乎凍齡，更加唔追求做美魔女，她說：「年紀大自然會有痕跡，好正常。」
女藝人唔可以老？
葉蘊儀近日響Youtube頻道《Gloria Yip 葉蘊儀 》同觀眾探討「女星唔可以老？女藝人係咪要凍齡先至好？」事緣早前李綺虹在個人社交平台上載了一幅素顏照，惹來唔少評批的聲音，令到葉蘊儀有感而發。
影片中另一主持人提到有些人會覺得「你係藝人，依一世都係藝人」，葉蘊儀就坦言唔認同，「工作嗰時係要做好，但我都有私人生活，私底下嘅自己唔鍾意化妝出街，就算大家覺得我唔化妝唔好睇，但我會覺得依個係我私人時間，我比較想做返我自己。」
無特別追求凍齡
有「不老童顏」美譽的她，自言無特別追求凍齡或者做美魔女，她說：「年紀大自然會有痕跡，可能皺紋變多、皮膚無咁好、肥咗，我覺得係正常。」她亦呼籲觀眾們要接受自己的偶像或其他藝人有自己的選擇，「唔一定要個個都好似以前個樣先係啱，要接受她們隨住年紀會有唔同變化，可能會發福、有皺紋、白頭髮，無咩大問題，無需要過份批評。」
她亦提到葉童同葉蒨文都係一頭白髮，認同她們唔染髮的做法，「依樣係好自然，年紀大頭髮變白好理所當然，唔需要特登染髮。」
她認為每個人都有唔同選擇，「主要係自己想點，想自然啲定keep住靚？」她以鍾楚紅為例子，指紅姑依然好靚，「雖然有老態，但佢好接受自己，崇尚自然。」
而現階段的她最想優雅地老去，「接受自己年紀的長大，會老係好正常。我自己就鍾意做返自己年紀嘅嘢，唔需要刻意搞到好似細個嗰陣時咁，無可能永遠停留響同一階段。人會大，身邊鍾意你的人都會成長，所以我覺得唔需要對人太mean，批評佢哋唔保養自己。」