62歲林俊賢淡出娛樂圈多年 意外登Google熱搜娛樂名人NO.1 全因為依個原因！
「Google香港2022年度搜尋榜」日前公布，Google搜尋趨勢反映住過去一年香港人最關心嘅話題。「熱搜娛樂名人」第一位估唔到由淡出多年的演員林俊賢爆冷獲得，受到的關注仲多過時下當紅歌星藝人！
62歲的林俊賢響80年代尾同周星馳、梁朝偉、劉青雲、溫兆倫並列TVB一線當家小生，代表作有電視劇《男兒本色》、《人海驕陽》，1993年主演台灣電視台製作的《唐太宗李世民》後，旋即紅遍兩岸三地，到達事業巔峰。
林俊賢響1996年淡出娛樂圈從商，到2013年開始先慢慢復出拍戲，不過對上一部作品已經要數到2017年的電影《風林火山》。點解淡出多年嘅佢會登上熱搜榜NO.1呢？原來係佢同前妻Jasmine所生的囡囡林鈺洧 (Denice) 奪得今屆香港小姐冠軍，佢戥囡囡高興之際，卻被前妻指控佢家暴、要求墮胎、無盡父親責任養育女兒、要求女兒驗DNA等等。
大概係一連串負面新聞引發網民好奇心，令佢成為熱搜第一位。林俊賢同Jasmine響囡囡Denice 1歲半時離婚，囡囡跟咗媽媽，父女二人再見面時Denice已經7歲，不過關係疏離。到Denice 15歲時，林俊賢先透過Facebook再次搵返囡囡，父女相認開始聯繫返。
面對前妻的指控，林俊賢雖然承認有過兩次肢體衝突，不過第一次係因為「自衛」而還擊對方一巴掌，第二次則係受前妻多次精神暴力，被對方用手指住鼻時忍唔住咬佢手指。至於要求囡囡Denice驗DNA，林俊賢一開始係否認，後來又改口指響囡囡7歲那次見面係無驗DNA，但15歲父女重逢時確實有驗。
佢話自己雖然唔係完全稱職的爸爸，但當年有畀生活費，二人重逢後，亦有直接畀錢囡囡。爸爸媽媽隔空互罵，身為女兒的Denice就話上一代的問題，做後輩唔應該插嘴，佢亦唔會做和事佬，更強調爸爸從來無撫養過佢。雖然被前妻鬧爆、囡囡唔幫，但林俊賢就獲前女友同埋仔仔力撐，相信佢唔係會家暴的人。
對於連串負面新聞而意外登上排行榜第一位，林俊賢接受傳媒訪問時坦言「非常唔開心」，但馬上安慰自己：「正面諗，都係好事。」