48歲陳奕迅驚一睡不起：有咩要交代？電話password點算？銀行啲錢點算？
48歲嘅陳奕迅 (Eason) 一連25場嘅紅館演唱會最近揭開序幕，佢響第一場首度分享久違9年嘅開show心情，坦言等待開依個show等咗3年，愈等愈驚，驚到一個地步係擔心會一睡不起。
Eason演唱會名為《FEAR & DREAMS》，佢響首場同觀眾吐心聲，講出自己嘅恐懼。佢直言年紀大咗，變得好易喊。以前做嘢未試過停頓，但依個show正正響3年前停咗，因為有好多時間等待，所以都好多嘢諗。Eason話內心好想完成依件事，但愈等個人愈驚，去到一個地步係驚瞓咗第二日起唔返身，然後開始諗身後事：「有咩要交代？電話password點算？銀行啲錢點算？」
佢話自己愈諗愈多，但講唔出點解會咁驚，而Eason面對恐懼嘅辦法就係唔諗，佢話：「唯一個辦法諗到，就係唔諗，所有嘢控制唔到，唔諗就掂。最緊要有嘢要做，最緊要係依一刻，先係最真實。」
人到中年，你會唔會都突然間擔心自己隨時會離開呢？面對死亡同身後事，預唔預先諗定真係好個人嘅選擇，好似Eason咁，佢就選擇唔諗，最緊要擁抱眼前真實嘅一刻。不過如果想預先好好規劃，其實都唔係一件壞事，好似響日本就好流行「臨終筆記」、「老前整理」、「生前契約」依啲概念。既然出現咗擔憂，不妨認真諗諗，將想話畀親友知道嘅事情紀錄下來，對自己、對親友都好！