作家西西去世享年85歲 晚年仍致力創作：我對一生無悔，無愧於我的父母、我成長的地方
香港著名作家西西因心臟衰竭離世，享年85歲。西西生前同朋友創立素葉出版社，出版社嘅Facebook素葉工作坊公告：「西西今晨八時十五分因心臟衰竭，在醫院安詳離世，家人、何福仁、梁滇瑛陪伴在側。西西一生，精彩丶愉快，並且有益，有意義。我們都會懷念她。」
西西原名張彥，1937年響上海出生，1950年跟隨父母移居香港，就讀協恩中學。初中已經開始投稿香港嘅報刊雜誌，後來進入葛量洪教育學院（今香港教育大學），畢業後響官立小學任教，但到42歲就提早退休，專心寫作。西西曾經講過，會用依個筆名係因為「西」依個字，睇落好似一個著裙的女孩子兩隻腳企響一個四方格裡，「西西」就係小女孩在跳飛機，正正係佢細個最鍾意玩嘅遊戲。
佢一生創作極為豐富，作品涵蓋散文、小說、新詩、劇本等等，代表作有《我城》、《像我這樣的一個女子》、《哀悼乳房》等等。其中《哀悼乳房》係紀錄咗佢患乳癌嘅經歷，西西響1989年因為乳癌而需要做手術，但手術後遺症卻令佢右手無法再書寫，從此改用左手寫作。
直到晚年西西仍然創作力驚人，持續推出新作，今年書展就推出繪本詩集《動物嘉年華》，亦將從未結集嘅14篇小說輯錄成書《石頭與桃花》，並首發《西西看電影》首卷。今年5月23日，更獲「第16屆香港藝術發展獎」頒發「終身成就獎」。
雖然晚年面對三高、牛奶敏感、患病，甚至消瘦20磅，但根據好友何福仁所述，識咗西西50年，從未聽佢抱怨過一句，響佢身上睇到一種永不放棄嘅做人態度。西西生前接受訪問時被問到回望人生，最欣慰同最後悔嘅事係咩？佢答：「欣慰的事很多，早年認識一群電影發燒友，看過許多好電影。此外，和朋友合辦素葉出版社，志同道合，有趣又有意思。我又和朋友去過許多想去的地方。」
當講到後悔嘅事，西西話：「我對一生無悔，無愧於我的父母、我成長的地方。真要找，可能是年輕時沒有好好鍛鍊身體。現在每一天量度血壓、血糖，都正常，就是美好欣慰的一天。」