60歲王傑出道35周年 驚喜出新歌聲線依舊滄桑 當紅時因病淡出稱曾被落毒致失聲
60歲嘅王傑淡出娛樂圈多年，近年定居加拿大，間唔中會響社交平台同粉絲互動，出道快將35年嘅佢，最近突然推出新歌，係改編自出道成名作《一場遊戲一場夢》(即係《幾分傷心幾分痴》嘅普通話版本)，令粉絲大呼驚喜！
王傑響1987年以一首《一場遊戲一場夢》響台灣爆紅，由於聲線滄桑，成日被稱為「浪子」，同齊秦、童安格、周華健並稱「台灣四大天王」，不過響事業如日中天之際傳出生病而淡出，後來復出無幾耐又稱被落毒以致失聲。響2018年推出專輯《我知道我是一個已經過氣嘅歌手》後淡出樂壇旅居加拿大，之後都甚為低調。
佢對上一次響社交平台出po已經要數到2020年，當時全世界都正受疫情影響，佢就出po鼓勵大家：「我老了，但是我依然不忘初心！思想依然可愛，心中依然充滿了愛，艱難時期，大家保重，永遠愛你們。」
沉寂多時嘅佢，揀響接近出道35周年嘅日子，改編成名作《一場遊戲一場夢》，新歌歌名叫《一場遊戲一場夢（結束篇）》，佢話：「《一場遊戲一場夢》對我嘅意義非常大，依首歌讓所有人認識我，35年之後保留原裝、和弦走法，同埋所有原裝音樂風格，只不過詞曲方面重新改寫，為嘅就係等大家響任何情況下，新版舊版都可以任意切換來唱。」佢希望透過新歌對作曲嘅王文清同埋編曲嘅陳志遠表達敬意同謝意，同時亦送給歌迷嘅年末大禮。
唔少歌迷話可以再聽到王傑唱歌好感動，認為佢嘅聲音一樣滄桑，甚至隨住年紀增長而變得更有味道！聽完新版《一場遊戲一場夢（結束篇）》之後，你有無同樣感覺呢？