82歲球王比利患癌病情惡化 女兒病床邊緊抱陪過聖誕：共渡多一個晚上
曾經帶領巴西國家隊3次奪得世界盃冠軍嘅球王比利，今年已經82歲，最近傳出癌症惡化，佢嘅女兒Kely Arantes Nascimento響聖誕前夕於社交平台分享咗一張抱住臥病在床嘅爸爸嘅感人照片，並寫上：「共渡多一個晚上」。
根據外國傳媒報導，球王比利嘅癌症日益惡化，腎臟同心臟亦開始出現問題。由照片可見，Kely抱住瞓響病床上嘅比利，將個頭靠響爸爸心口上，而只有左面入鏡嘅比利，就將手搭響囡囡手臂上，照片中亦見到比利面上掛住氧氣管。
Kely留言寫道：「我哋仍然響醫院，保持信心地同病魔搏鬥，共渡多一個晚上」。
球王比利所入住嘅醫院早前指，佢嘅大腸癌已有惡化跡象，需要比較全面嘅護理，以治療腎臟同心臟衰竭。
Kely響12月18號曾經上傳上一張妹妹Flavia為爸爸按摩左腳嘅相片，當時比利響度睇緊世界盃總決賽，賽後比利更向冠軍隊阿根廷隊長美斯道賀。而Flavia早前亦響社交媒體上表示，佢哋同爸爸會響醫院渡過聖誕節。
