英國國寶級時裝大師 Vivienne Westwood辭世享壽81歲 近年積極推動環保不言休
英國國寶級時裝大師Vivienne Westwood辭世，享壽81歲，早前佢嘅品牌社交網站公佈佢逝世消息，指佢於倫敦屋企響家人陪伴下安詳離世。
Vivienne Westwood由70年代踏入時裝界以來，一直以大膽前衛風格見稱，創下多個潮流經典，被外界封為「西太后」、「龐克教母」，終其一生透過作品表現反叛精神同創意，深深影響後世時尚界，影響力絕對舉足輕重。2006年更獲得英國皇室頒授勳章，獲封為女爵士（Dame）。
近年積極推動環保議題，即使已屆80歲高齡仍參與好多全球暖化、政治金融相關嘅社會活動同會議，佢認為現代人買太多衫，極簡化講求重質不重量，買得少但買得好、用得耐更為重要。
身為時裝大師嘅佢亦思考時尚產業可以如何減少對環境嘅影響，並先由自己嘅事業開始改變，例如：唔浪費布料、回收再利用、使用再生能源、選用有機材料、拒絕使用毛草、皮革、塑膠、聚酯纖維等。
Vivienne Westwood曾經被問到幾時退休，當時佢咁答：「退休？如果退休係為咗去做自己鍾意嘅事，咁我而家都做緊鍾意嘅事！」