顧嘉煇去世享年92歲 曾談與黃霑合作軼事：時間緊迫，我打電話哼旋律畀佢填詞
殿堂級作曲、編曲及指揮家顧嘉煇先生，於2023年1月3日在加拿大離世，享年92歲。
顧嘉煇1931年響廣州出生，其後舉家移居香港。佢家姐顧媚係50、60年代著名歌星，顧嘉煇自細耳濡目染下開始學彈鋼琴，1961年參加邵氏電影《不了情》作曲比賽，正式開始作曲生涯。
70、80年代為多齣電視劇創作主題曲，包括《啼笑因緣》、 《狂潮》、《獅子山下》、《狂潮》、《上海灘》，以及《射鵰英雄傳》的《世間始終你好》等等，首首經典名曲，係一代香港人嘅共同回憶。顧嘉煇於90年代淡出，並移居加拿大溫哥華，但亦有偶爾為香港電視劇創作主題曲及回港擔任音樂會指揮。2015年，顧嘉煇決定正式退休，同年獲頒「金紫荊星章」。2018年底，再次返回溫哥華過退休生活，甚少公開露面。
與好拍檔黃霑的創作軼事
眾所周知，顧嘉煇同黃霑係多年好拍檔，顧嘉煇大部分嘅歌曲都係由黃霑填詞。當年有報導指，因為兩位拍檔住得好近，煇哥甚至可以響屋企望到霑叔屋企有無開燈，如果見燈亮了就會打畀對方，約出來傾偈、飲下嘢講下音樂。
煇哥響訪問中講過，以前為電視台製作主題曲，通常只有3星期時間，自己作曲已經用咗兩個幾星期，成日到最後一刻先畀到霑叔填詞。由於時間緊逼，當年科技又無而家咁發達，煇哥會打電話畀霑叔，然後逐個音符講畀對方聽，霑叔聽完旋律之後就開始填詞，好多經典名曲都係響咁趕急嘅情況下誕生。
兩位樂壇才子檔響1998年同2000年一齊舉辦過「煇黃演唱會」﹐大受歡迎成為一時佳話。兩個人本來仲計劃合辦舞台劇，但心願隨住霑叔響2004年因病離世而永遠無法完成。
霑叔離世後，煇哥曾表示一直視對方為學習榜樣，黃霑嘅離開係佢人生中永遠嘅遺憾，會永遠懷念佢。霑叔逝世10周年時，煇哥亦在訪問中提到每每聽到或聽到對方嘅音樂節目時，都會好懷念同佢一齊嘅時光同埋霑叔豪邁嘅笑聲，頓感寂寞。
如今兩位老友天堂再聚，希望佢哋在遠方能夠一圓創作舞台劇嘅心願，我哋會永遠懷念你哋兩位才子，多謝你哋為我哋留低咁多好嘅回憶！