82歲林小湛鋼琴了得 曾為英女皇演奏 透露將拍新戲：愈忙愈好，做戲做到100歲
82歲嘅林小湛響近期話題電影《毒舌大狀》中大彈鋼琴，展現超卓琴技之餘，氣質仲相當高貴。原來小湛姐5歲開始學鋼琴，唔單止響英國留學，仲響英女皇伊莉沙白二世表面演奏過，曾獲頒「英女皇銀禧勛章」，十分厲害！
小湛姐可以話生於書香世家，爸爸係澳門培正中學校長，而媽媽則係老師，熱愛藝術嘅佢仲係劇團成員。響父母嘅培育下，小湛姐5歲開始學鋼琴，19歲時通過英國皇家音樂學校第8級鋼琴考試，而且係全港最高分，獲考官推薦去英國皇家音樂學院留學。
英國畢業之後，小湛姐回港教音樂，再於60年代舉家移居加拿大，響大學教鋼琴，並修讀戲劇，45歲時先入行做演員。響演戲生涯裡，小湛姐於《真情》飾演高校長一角可謂最深入民心，好多人都係因為依個角色而認識佢。
好多人都以為小湛姐只係一位演員，但其實佢仲係一位鋼琴家，多次為皇室成員、國定首長政要演奏，最出名嘅一定係為英女皇伊莉沙白二世嘅國宴演奏，1977年仲獲獲頒「英女王銀禧勛章」，以表揚佢嘅音樂貢獻。
雖然已屆82歲之齡，但小湛姐保養得宜，甚至愈來愈雍容華貴。小湛姐未曾言休，不時為政府機構、企業、選美機構等擔任形象及禮儀培訓。佢最近亦透露將接拍杜琪峯新戲及兩部內地電影，佢自信體力應付得到，甚至認為愈忙愈好，表示會一直做戲做到100歲。