TreasureDo Whatsapp Group

創業有心唔怕遲!港媽57歲成立高級花藝品牌 GUCCI、YSL是她客戶

57歲先第一次創業,透過花藝展開了豐盛的第二人生,花藝師Ginger Wong由一個普通的家庭主婦,搖身變成高級品牌喜愛合作的對象,一切除了努力堅持外,仲唔少得囝囝的全力支持。

Ginger Wong (薑姐) 係花藝品牌GingerMite的創辦人,GingerMite中的ginger係薑姐,而mite係她的囝囝,GingerMite係兩母子一齊創立。點解薑姐響57歲先第一次創業,合作伙伴又會係囝囝呢?一切要由幾十年前開始講起。

當20年家庭主婦失去人生方向

薑姐後生時係一名設計師,她好鍾意設計工作,覺得好有挑戰性,但係自從兩個仔出世後,薑姐不得不退下工作崗位,專心湊小朋友。對於好多在職媽媽來說,工作同家庭可以並存兼顧,但因為薑姐兩個仔都有哮喘,一發作時情況就好緊急,稍有疏忽都可以好嚴重,薑姐有感比起工作,小朋友更需要自己,所以就毅然放棄設計師工作,專心一意照顧小朋友。依個家庭主婦角色,一做就係20年。

創業, 花藝, 第二人生, GingerMite

同好多全職媽媽一樣,當小朋友開始長大,變得獨立有自己社交圈子,唔再需要媽媽無微不至的照顧,薑姐覺得生活失去重心,成日無所事事,咩都無興趣做。尤其是當是Mite做時裝行業,成日都要去海外工幹,薑姐一個人響屋企,感到非常苦悶,甚至有抑鬱傾向,她不停思考人生意義,唔通自己以後就只能夠在煮飯同做家務渡過?

囝囝鼓勵用花藝創業展第二人生

有晚她忍唔住攬住Mite喊,哭訴自己的人生唔知做咩好。囝囝見到薑姐咁,就問她有咩興趣,鼓勵她搵些事情做。薑姐諗返自己一向鍾意花藝同植物,於是決定用它來展開第二人生。為了陪伴薑姐,Mite更辭去本身工作,專心一致陪媽咪追夢,就好似媽咪當年辭工照顧他一樣。

兩母子創立了花藝品牌GingerMite,薑姐負責設計同插花,囝囝負責開拓客源,品牌的宗旨係“LET US SHOW YOU WHAT THE UNIVERSE HAS BLOOMED FOR YOU”,兩母子希望他們的作品令人感到幸福,並察覺到世界為我們綻放的美麗。GingerMite走高檔路線,幫好多大品牌做場地佈置,海洋公園、YSL、GUCCI、THE TIFFANY都是她的客戶。

創業, 花藝, 第二人生, GingerMite

重拾生命熱情 母子感情提升

以旁人角度來看,GingerMite經營得相當成功,不過對薑姐來說,GingerMite的意義在於令她重拾生命熱情、心靈有寄託,意外收穫係同囝囝感情更上一層樓,兩母子一齊工作甚少鬧交,反而發現大家思想接近,好多事情都心照不渲。

薑姐話:「無論花定人生,都係從花蕾開始,經歷盛放,再面臨凋謝。只要把握當下的開心過程,活在當下,就不枉過了。」

創業, 花藝, 第二人生, GingerMite

相關閱讀:50歲後想創業?報名「賽馬會50+創豐盛計劃」 有專人指導仲有啟動資金!