【曾江突然離世】酒店隔離期間驟逝 享年88歲 曾傳同謝賢交惡 仔女關係一度疏離
香港資深演員曾江突然離世，今日被發現響尖沙咀酒店隔離期間昏迷不醒，經搶求後不治，享年88歲，死因有待調查。年事已高的曾江近年聽力轉差，需要助聽器輔助，早前曾傳出秘密入院醫病。
被謝賢公開掌摑 曾傳二人交惡
曾江係60年代當紅的男生，演出過幾百部電視電影，2015年憑《竊聽風雲3》獲得金像獎最佳男配角，播足40年的經典廣告「美源髮采」，陪伴幾代香港人成長。近年比較多人記得的作品有《四個小生去旅行》，同謝賢、胡楓、Joe Junior一齊主持旅遊節目，患有痛風的曾江響拍攝期間病症發作，全程要靠拐杖輔助。拍攝開越野車時更發生意外要入院，之後都要坐住輪椅繼續行程。
而響宣傳節目的記者會上，曾江同謝賢一度發生爭執，謝賢怒摑曾江，更波及坐響兩人中間的胡楓飛甩眼鏡。之後盛傳二人交惡，要靠曾江外甥女王馨平幫手擺和頭酒，勸兩老和好。不過謝賢後來接受記者訪問時，話自己同曾江好老友，話掌摑事件只係做戲。而響掌摑事件3年後，曾江、謝賢同胡楓3個曾經同枱食飯，相信已經重歸於好。
後生時唔識做阿爸 晚年修補親子關係
曾江經歷了三段婚姻，同首兩任妻子共育有一子一女，1994年同台灣演員焦姣結婚，婚後互相扶持至今。曾江坦言自己後生時鍾意去玩唔識做人阿爸，離婚後亦甚少同仔女交流，所以親子之間感覺陌生。大仔遠在溫哥華，一直好少見面，可幸近年修補了同囡囡的關係。曾江女兒由演藝學院戲劇系畢業後，二人多了共同話題，父女關係開始變得親近，雖然曾江做戲經驗比囡囡豐富，不過他未曾恃老賣老覺得自己一定啱，反而尊重女兒想法，他認為做人就係要互相尊重、互相學習。
幾多的風風雨雨、恩恩怨怨，隨住曾江突然離世，所有遺憾都無法再圓滿。珍惜同家人相處時光，無人知道幾時講再見，愛要及時，道歉要及時，講真心話要及心，修補關係要及時，令自己同家人都可以不留遺憾地離開。