51歲樊亦敏為健康狂減18公斤 杏仁過敏症令身型暴脹 靠3招減肥成功
51歲藝人樊亦敏早前響社交平台分享自己成功減走8公斤脂肪，唔少網民讚佢靚咗好多，紛紛問佢點樣減肥。
樊亦敏響拍攝TVB劇集《金宵大廈2》時，因為杏仁過敏症而變胖，體重更一度上升至71公斤，之後佢決心減肥，慢慢減到去53公斤，足足輕咗18公斤！而家嘅佢清減咗好多，睇落都唔似50歲。
樊亦敏自細身體就比較多病痛，患有哮喘嘅佢，有一段時間無辦法躺下來瞓覺，因為一瞓低就抖唔到氣；亦曾經試過免疫系統出問題，令佢不停甩頭髮。而令佢肥胖嘅主要原因，就係杏仁過敏症，一食麩質就會唔舒服，不過佢都坦言以前嘅自己其實唔係好理過敏，咩都照食，結果為身體留咗一堆手尾。
樊亦敏健康減磅方式
佢今次減肥主要唔係為咗靚，而係希望可以更健康。由於肥胖係因為過敏症而來，所以佢首要任務係努力治療過敏，並用咗以下3個健康方式慢慢減磅：
1. 戒掉令佢過敏嘅奶類、糖同麩質
2. 根據營養師餐單調整飲食
3. 每日行路30分鐘
另外，佢認為心態好重要，明白自己係易肥易瘦體質，對於肥瘦順其自然，唔認為瘦就一定好，有時肥都可以好靚。今次減肥純粹係因為必須正視健康問題，響減肥過程中，佢都堅持要健康地慢慢減，堅拒極端嘅快速減肥方式。佢嘅努力證明咗，只要堅持落去，一定可以重拾健康身型！