倪匡逝世享年87歲 生前患皮膚癌拒化療 自言唔怕死 離世不過係早日解脫
今午 (7月3日)傳出名作家倪匡逝世的消息，享年87歲。倪匡生於1935年5月30日，同金庸、黃霑、蔡瀾被喻為「香港四大才子」，亦係著名作家亦舒的哥哥。
倪匡著書作無數，《衛斯理系列》、《原振俠系列》、《女黑俠木蘭花系列》，唔少香港人都係睇倪匡的書成長。
他響64歲時接受壹週刊訪問時，曾經提到對死亡的睇法，他認為人終有一死，所以對死亡睇得好淡，他亦提到人生中充滿住「配額」，當時的他覺得自己好多配額都已經夠期。以前一日食5包煙、兩年前一日飲一公升XO，但忽然有日一覺醒來，發現食煙飲酒的配額滿了，所以唔再食煙飲酒。
壹週刊記者問他幾時體會到人生中充滿配額？倪匡答：「近年年紀大了，有好多配額響不知不覺間用完了，話無就無。我非常相信一個人的生命中咩都有配額，這些配額由生命密碼決定，但人類對此一無所知。」
而他自認對死亡一向睇得好淡，人終有一死，所以25歲死定85歲死都無咩分別，60年的差別對宇宙來說不過係一剎那，根本無影響。他自言唔怕死，只係怕病，如果病的話唔會醫，希望死了就算。
事實上，倪匡在2019年曾透露患上皮膚癌，雖然醫生曾建議他接受化療，但他認為自己都就快同癌症同歸於盡，所以唔打算做化療。據悉他生前曾對朋友說自己「唔怕死」，認為離世係「早日解脫」。