粵劇名伶阮兆輝76歲不言休：有目標係好事，未達標唔心息，依股動力對身體好
粵劇名伶阮兆輝這個名字大家都唔陌生，今年76歲的輝哥雖然貴為粵劇界大前輩，獲得殊榮無數，並於香港中文大學音樂系擔任客座教授培育新一代，但他並未滿足於此，仍然不停作出新嘗試，希望透過不同方式推動粵劇文化，最新作品有兒童劇《樂樂公公串串貢》，以有趣生動的舞台將南音介紹給小朋友。
7歲做童星全因一個字
首登兒童舞台的輝哥今次要同兩位小朋友一齊夾戲，他大讚同劇小演員十分專業，「一埋位就認真做，響屋企都有練習。做舞台劇無得NG，我覺得都幾難，但他們都應付到。」看著小演員們，輝哥諗起自己細個做童星的回憶，「當時雖然捱更抵夜，但片場內的大人對我們好好，導演、名演員都好照顧我們這些小朋友。」
輝哥自7歲起踏足電影業，做電影沒多久就踏台板做大戲，後來又加入電視台，係少數跨界別表演藝術家。講起細細個就去面試童星，輝哥說原因無他，只因一個字——窮，「細個憧憬可以過更好的生活，所以告訴自己要勤力聽話、盡量唔好NG，人哋先會繼續用你。」
他的童年生活沒有正式上學，大部份時間都在片場和練功做戲中渡過，雖然不像其他小朋友可以時常結伴玩耍，但輝哥自覺童年過得並不賴，「吸收了很多一般小朋友沒有的經驗，在片場接觸很多大人，看到他們的工作態度，加上我最初工作的電影公司很嚴謹，在那裡學習了很多。」
年青時就愛創新，唔去試點知得唔得？
輝哥近年積極推動粵劇文化及培育新秀，而且作出很多不同嘗試，例如拍Youtube講解粵劇，同流行歌手張敬軒crossover《魂遊記》，如今演出兒童劇向小朋友介紹南音，讓大眾從多角度認識粵劇，問他為何總能跳出框框不斷嘗試？他說：「做小朋友時覺得好多老人家好古板，乜都話唔得，明明做到都唔去做。當然大戲的規條要謹慎對待，我全部都要守，但係咪代表咩都唔可以試？如果有機會成功而我又有興趣的，點解唔嘗試？」
其實他後生時就喜歡嘗試和創新，1971年成立了香港實驗粵劇團，想要找尋粵劇新的出路，雖然當時被鬧亂搞一通，但那份實驗精神沒有被淋熄並且延續至今，「樣樣野都係試出來，唔去嘗試就唔知得唔得。」
比起失敗，輝哥更怕無去嘗試，「表演藝術上的嘗試，即使失敗了都無咩大不了，覺得應該試就去試。好多人有固有框框，覺得自己都幾十歲，捱到某些地位，如果嘗試失敗咪好醜？我就唔係咁覺得，例如我去做兒童劇，係咪好多人憧憬我會做得好好呢？唔會的，可能大家係抱住『睇下你依個伯父得唔得』的心態。如果得當然喜出望外，如果唔得咪最多下次唔做。」
整個人生，失敗一定多過成功
輝哥面對失敗時坦然豁達，這與他7歲時的一次童星面試經歷有莫大關係。那次爸爸帶他去考童星，經過一輪比賽甄選，他成功殺入最後三強，他好記得爸爸在最後一場面試前對他說：「你得三分一機會贏，唔係一定取錄你。」結果他真的沒獲選上，年紀小小的他第一次感受到失敗的滋味，「那個失敗對我來說係一個好大教訓，原來勇往直前唔一定得，係會失敗的。」
他說自己的人生係從失敗開始，所以不會輕易被失敗擊倒，「整個人生，失敗一定多過成功好多。」輝哥喜愛讀歷史，常常以古為鑑，他說：「不論中史西史，好多偉人都係失敗後企返起身，最重要係承受失敗、知道失敗、檢討失敗。」
入行近70年從未諗過退休
投入粵劇界快將70年的輝哥，問他可有一刻想過退下來？他斷言：「我無諗過退休，無諗過停落嚟。」7歲加入表演藝術行業是因為貧窮，76歲仍不言休則是單純因為鍾意，「我好幸運，我唔止係一個演員，仲係一個戲迷，能夠做到鍾意做的事好開心，到今日為止仲有事情想嘗試，令自己有個永遠達唔到的目標。」
他續說：「有目標係好事，令人有動力，因為未達目標心唔息，常常記掛有事情未做完，依股動力對身體好。如果一早做曬，聽朝起身做咩好？」輝哥說罷隨即哈哈大笑。
他鼓勵大家都要搵寄託，「唔一定係大事，可以係好小事，鍾意食嘅就同朋友周圍去食。」最重要係唔好成日覺得自己無用，「年紀大咗體力各方面一定不像年青時，但做自己可以做的事、未接觸過的事或鍾意做的事。有句說話好恐怖：『臨老至學吹打？』其實唔緊要的，自己鍾意咪去做！」
(照片由受訪者提供)
——————————————————-
前文提到輝哥演出的兒童劇將於7月15日公演，有興趣帶埋孫仔孫女一齊睇就唔好錯過！
《樂樂公公唱唱貢》(國際綜藝合家歡2022節目)
演出日期、時間：
2022年7月15日 ‑ 17日 (每日) 下午2時30分 ‑ 3時30分 (1小時)
2022年7月15日 ‑ 17日 (每日) 下午4時30分 ‑ 5時30分 (1小時)
2022年7月16日 ‑ 17日 (每日) 上午11時30分 ‑ 下午12時30分 (1小時)
場地：葵青劇院 黑盒劇場 (香港新界葵涌興寧路12號)
票價：$260 (不設劃位) (6歲或以下兒童／60歲或以上人士 半價優惠)
年齡：3 歲或以上
購票：按此