人物

76歲阮兆輝　隨遇而安順應天命：這齣戲由天去編劇，人只好盡力做

July 14, 2022July 14, 2022 粵劇, 藝人, 阮兆輝

阮兆輝，粵劇界的資深代表，7歲開始踏台板做大戲，出年就係從事演藝行業70周年。76歲的他說話時聲音清晰響亮，魄力十足，到底是如何養出好身體？

練功多年身體好　自言少做運動無戒口

他認為一切歸功於做大戲練功多年，「台上好多動作都係健身，練功亦要識換氣、調整呼吸，唱歌要發力唱，將肺開到最盡，這些都係對身體好。我有段時間會去老人院同老人家唱歌，都鼓勵他們放盡把聲去唱，問過醫生都話咁係好。」

至於練功以外的養生秘訣？輝哥老實地說自己無恆心日日做運動，飲食也沒特別節制。「練功周身傷，小毛病一定有，舊患唔舒服時就做兩下舒展運動，舒服咗就算，但話日日做運動？我一定唔係咁嘅人！」

那飲食方面有特別注意嗎？輝哥簡短地說了一句：「無，幾乎算係暴飲暴食。」輝哥認為最緊要心情好，「恨食一樣野又食到，心情都好啲。」除非食完唔舒服或醫生要求戒口，一般來說他甚麼都吃，他覺得可能正因如此，所以樣樣營養都有吸收到。

阮兆輝-鄧拱璧-夫妻 — 輝哥太太鄧拱璧（BoBo姐）姐愛宴客，不時邀請朋友到屋企作客相聚

雖然無日日運動或注意飲食，但並唔代表輝哥唔關心健康，輝哥話一定要年年做身體檢查，一有唔舒服就要立即睇醫生，「年紀大咗要有心理準備同埋常識，知道身體有啲咩症狀可能係代表有咩問題，如果同平常有異就要搵出原因，依方面我好謹慎。」

親哥患癌離世啟發對生死看法

當談到生死，他一樣看得豁達：「有生就有死，幾時無人知，個天要你走就走。」輝哥指他哥哥的離開對他有很深啟發，「哥哥只大我幾年，但50幾歲就走咗，cancer走。」他憶起哥哥在診斷出cancer當天還打電話來約他飲茶，閒聊間才講起自己患上cancer，輝哥擔憂哥哥身體狀況，反倒是哥哥泰然自若。「佢比我樂觀太多，佢離開前我感覺到佢好辛苦，但佢樂天到無呻過無怨過。佢好順其自然，覺得有病就係咁，就係會辛苦。」

哥哥的悠然自得教會他如何面對生命消逝，如今他不為將來過份憂慮，「有些人一早打點好身後事，但我覺得安排咁多都無用，你鍾意點唔鍾意點到時都未必做到，有好多事唯有放鬆，有日有事咪有事。」

提到自己的爸爸和師傅都是在睡夢中去世，輝哥認為這樣很好。最唔好就係臨尾行動不便要人照顧，但假如萬一真係發生，就只好調整想法，命運如此安排，雖然無可奈何但也得接受。人生如戲，只是這齣戲由天去編劇，人就只能盡力演好它。

如果改變唔到，就唯有接受