TreasureDo Whatsapp Group

67歲周潤發身家豐厚 生活卻極簡樸 金錢觀豁達捐出20億財產:錢不是我的,我只是暫時保管

67歲周潤發生活節儉,閒時會搭地鐵,更成立慈善基金,身後將捐出20億身家。點解發哥會咁做?全因為見過呢個人?

貴為影帝的發哥周潤發出名親民,出入搭地鐵,九龍城餐廳、大埔街市都係發哥常去的地方。雖然身家豐厚,但生活就過得相當簡樸,發哥早幾年接受韓國電視節目訪問時,被問到係咪會捐出身家,向來低調的發哥笑而不語。

坊間估計發哥的身家豐厚,至少坐擁20億,甚至有報導指他的身家多達56億,不過有傳發哥早已捐出身家,平時他的生活亦十分簡單,他接受訪問時曾提到自己唔著名牌,一件衫可以著十幾年,一部Nokia手機都用了17年,雖然最後都有換到智能電話,不過發哥就話:「我哋其實唔需要太多資訊,而係應該學會傾聽內心聲音。」

周潤發身家

韓國電視節目《真實故事探索隊》早兩年訪問發哥,當中問他到係咪會捐出全副身家給慈善機構,當時發哥無正面回答,只係報以微笑,但就大方分享自己的金錢觀:「錢唔係人可以永遠擁有,只要人一走,錢都係要留畀其他人,而家啲錢擺銀行,其實死後都係一蚊都帶唔走,不如諗諗捐畀有意思嘅機構。」而發嫂陳薈蓮響後來的訪問都表示:「我哋已經將依筆錢百分百捐了出去,已設立好慈善基金會,手續都辦妥了。」

發哥對錢睇得豁達,更曾經講過:「錢不是我的,我只是暫時保管。」有傳係因為同台灣的淨空法師見過面 (已於上月圓寂,享年96歲),受到淨空法師推崇「拿得起、放得下、不執著」等理念影響,所以決定捐出所有身家回饋社會。

相關閱讀:跟住發哥開餐!3間 周潤發 喜愛的食肆 你試過幾多間?