85歲余慕蓮計劃離世後捐身家 肺纖維化曾病危：對死亡完全唔恐懼，每過一日都係賺咗
85歲的余慕蓮 (魚毛姐) 前年因為肺纖維化而送入ICU留醫，病情一度惡化，更有指她曾經傳語音訊息同好友道別：「若不能醒來，便下世再見」。好在經過半年治療，魚毛姐健康況好轉大步檻過！
手術留後遺症 每過一日都自覺賺咗
魚毛姐早前接受訪問時指，而家已經無再咳同氣喘，但做完手術有後遺症，會成日咳到流眼淚、流鼻水；加上患病期間有大半年都躺在床休養，所以需要持續復健行路，她坦言行動唔太方便，出街要拎拐杖，返醫院覆診要坐輪椅，就算去電台訪問都要專車接送，拍戲更加係唔可能。
雖然辛苦，但魚毛姐自覺已經相當幸運，她說：「醫生話個病無得根治，10個人入去做手術，9個人係出唔返嚟，不過我對死亡完全唔恐懼，我已有心理準備，而家每過一天，我覺得已經賺咗。」
魚毛姐一生未嫁，單身多年，膝下無兒無女，好在得一班好朋友照顧，好友米雪更幫她請工人姐姐照顧起居飲食。
終身未嫁 唔介意做丑角
童年受父母離異影響，魚毛姐自小缺乏愛，令她變得唔相信愛情，即使年輕時有追求者，但她都唔敢敞開心房，唔畀機會人亦唔畀機會自己，全因害怕投入感情後，自己會變成一個容易受傷的女人。
入行接近70年的魚毛姐，最大的願望係娛樂大家，雖然成日都做垃圾婆、清潔工人等丑角，不過她從來唔介意，反而樂觀地認為做這些角色無人同自己爭，可以一直做落去，「我唔介意自己唔係做美女，我鍾意做戲，最重要係觀眾鍾意睇。」
熱心公益 打算離世後捐出身家
除了演戲外，魚毛姐亦熱心公益，曾經捐獻成份退休金給貴州興建「余慕蓮希望小學」，等山區學童唔使每日長途跋涉返學，仲謙稱只不過係「略盡棉力」。魚毛姐亦計劃將來離世後，會將財產捐給慈善機構。