88歲方太慶祝生日 慈祥和靄精神奕奕 原計劃5月移居新加坡陪孫仔 生日願望與家人團聚
大家有無跟過方太學煮餸呀？唔經唔覺，香港烹飪節目主持方太 (方任利莎) 今年原來已經88歲，方太的女兒阿寶早前響社交媒體上載方太的生日照，好開心見到方太仲係咁精神奕奕！
方太日前慶祝88歲生日，而女兒阿寶就響Facebook分享了兩張相片，一張係方太正在切蛋糕，另一張就係捧住一籠壽桃，照片入面方太精神奕奕，笑得好開心之餘仲散發住一種慈祥和靄的氣質。女兒阿寶寫道：「今天（14日）是方太的生日（她算農曆，所以每年的西曆生日都不一樣），我們在港的親人跟她慶祝！期望很快可以與所有家人團聚，媽媽生日快樂！祝福健康喜樂 如意吉祥」。
相信好多女士後生時都跟過方太學煮餸，原來方太一開始會上電視教煮餸，係因為想賺錢讓仔女上多點課外活動。後來烹飪事業發展得愈來愈好，造福了一眾「煮婦」，係唔少太太的偶像，方太之前仲講過：「而家都有後生仔跑嚟同我講，係食我啲嘢大，我都覺得好開心。」
方太早前接受新加坡電台訪問時話，自己本身係新加坡公民，原本諗住今年5月移居新加坡，想多點時間陪下細孫仔，但因為疫情所以未動身起程。方太仲話如果有機會的話，希望可以再開一個烹飪節目做一段時間。
謙虛的方太成日強調自己唔係廚師，只不過係煮些家常便飯，無咩了不起，但正正係依種平實，叫人今日回味起來，仍有種溫暖的感覺。