粉絲酒吧偶遇57歲奇洛李維斯 隨口邀請參加婚禮 無諗到男神一小時後真係赴約
57歲奇洛李維斯（Keanu Reeves）雖然貴為荷李活巨星，但生活相當貼地，不少外國網民都曾經野生捕獲他，個個大讚他友善親民，網路上對他的美談更係不絕於耳。最近有粉絲響酒吧偶遇男星，估唔到隨口邀請他參加自己的婚禮，一小時後他竟然真的應邀赴約！
根據《每日郵報》報道，奇洛李維斯而家響英國為Disney+拍攝緊。有日粉絲兼新郎哥James響酒店酒吧偶遇奇洛李維斯，就好開心咁上前打招呼，同男神握完手後，鼓起勇起同奇洛李維斯講：「今日係我婚禮，如果你可以參加宴會就好喇！」James仲幽默咁同男神講：「我個老婆好想見到你，你一定唔會走漏眼，因為我老婆著住一條好大條嘅白色裙。」
其實James只係隨口講下，根本無諗過依位國際巨星會赴約，點知一個鐘之後，奇洛李維斯真係出席他的婚禮，成為一對新人的超級驚喜，新娘Nikki話男神親切友善，「佢握住我的手，給我擁抱，仲恭喜我，簡直係超現實！」
Nikki仲話奇洛李維斯祝賀完他們後並無馬上離開，而係響現場逗留了10分鐘左右，同其他賓客傾偈，而且對合照要求照單全收。
