效力TVB 44年唔續約 65歲鄭裕玲認3年疫情改變心態 舊同事相繼離世深感要把握時間做想做的事
今年65歲的鄭裕玲 (Do姐)，早前響電台節目《口水多過浪花》親口宣佈已離開效力44年的TVB，合約到期時並無續約，她在節目上表白決定離開合作近半個世紀的東家的心路歷程。
Do姐響1978年加入TVB，拍過無數家傳戶曉的經典劇集，例如《網中人》、《親情》、《季節》等，同時亦係一位出色的司儀。與TVB合作44年都決定唔續約，Do姐心知外界一定好多傳言，亦知道好多朋友關心她的去向，所以響電台節目中親自解釋。
3年疫情改變心態
「首先我覺得，依3年疫情對大家唔多唔少心態上係會有唔同、有改變，想法都唔同咗。」Do姐說。雖然TVB對她很好，她覺得唔適合的工作，可以直接跟公司講唔做，但礙於始終簽了合約，還是要履行一定合作，比較難按排自己的時間同行程，「我成日響《口水》講，我無得去旅行，而家可以去旅行，但唔係話可以想玩幾耐就幾耐， 譬如話有節目，你都要返嚟做，因為有一個合約精神，你都要返去做。」
Do姐指疫情初期感受仲未咁強烈，但去到後來想法開始改變，「尤其係今年，覺得好多嘢，你plan咗咁樣，但最後未必係咁樣。同埋依幾年見到好多人pass away，以前啲同事呀咁，如果自己有些事想做，礙於合約關係又唔可以去做的話，我就覺得有點可惜。」
想嘗試自由身
Do姐又指自己一直響同一間公司工作，好想感受一下自由身的滋味，「咁啱合約滿啦，咁就不如試下做自由身，所以就並唔係話同邊個唔開心、係唔係做咗啲乜嘢唔開心、或者有啲咩唔好，並無依啲原因。」
她指以後會繼續工作，但就唔會簽長約，「因為好多嘢未試過，唔排除一切合作的可能性，無論同邊間機構又好，做啲乜嘢又好，所有都會考慮，因為我想試吓新嘢。響TVB做咗咁耐，出面有無啲乜嘢possibility我未試過呢？所以響度賣個廣告，有啲乜嘢工作，可以DM去我IG，乜嘢都可以傾，演唱會我唔得啦。」
天下無不散之席
響TVB做咗40幾年，Do姐坦言自己都有唔捨得，而TVB亦很尊重她的決定，最後一次回面時氣氛愉快，「有講到話如果將來有節目係適合我，我又覺得自己啱做，我都會為佢哋效力。」
Do姐續說：「天下無不散之筵席，而家我仲可以決定的時候，就不如決定咗佢，掙扎緊係有少少，有幾多個人可以響一間機構服務44年呢？但係都覺得而家呢個timing係啱架喇。」