50歲後生蛇 9大Q&A｜細個生過水痘 中高年生蛇機會大增！如何預防及治療？
年紀漸長，身邊開始有朋友生蛇。到底咩係生蛇？點解通常50歲之後就會有依個問題？要點樣治療同預防呢？以下逐一講解！
問：咩係「生蛇」？
答：「生蛇」嘅正確名稱是帶狀疱疹，一種令人痛楚、呈帶狀嘅紅疹並帶有水泡嘅傳染病，由引起水痘嘅水痘帶狀疱疹病毒引致。
問：點解50歲或以上人士比較容易生蛇？
答：曾經生過水痘嘅痊癒者，水痘帶狀疱疹病毒仍然會潛藏體內嘅神經系統，當身體免疫力下降，例如隨年紀漸長或遇上生活壓力時，就有機會誘發生蛇。
年紀係生蛇嘅最主要元兇，尤其是50歲以上人士，年紀愈大愈有機會患病，長者因體弱免疫力低，蛇嘅風險更比後生仔高出8至10倍。另外，壓力大、情緒不穩、過勞都係發病誘因。
問：生蛇有咩徵狀？
答：受感染嘅部位首先會出現痕癢或微痛，帶有灼熱感覺，1至3日後會出現紅疹；紅疹會變成水泡，再蔓延成帶狀（出現位置根據受感染嘅神經線分佈）。水泡可持續1至14日，期間或會出現膿皰或血水。然後水泡會潰破或萎縮，乾水後結痂，為期2至3星期，響皮疹消失之前，皮膚仍會感到痛楚。
問：點解生蛇嘅紅疹會圍繞身體？
答：生蛇係神經線受感染，背部同腰部嘅一側係最常見嘅發病部位，所以水泡會出現響身體左邊或右邊，睇落似圍繞身體。有時候亦會感染手、腳同面部嘅神經線。身體兩邊同時「生蛇」亦偶有發生，代表左右兩邊嘅神經線均受感染。
問：生蛇會傳染其他人嗎？
答：帶狀疱疹具傳染性，但比水痘嘅傳染性較低。未感染過水痘或未有接種預防水痘疫苗嘅人士若接觸患者疱疹患處（或受其污染嘅物件），就有機會受感染而出現水痘，但第一次感染並唔會出現帶狀疱疹。如果係免疫力比較弱嘅長者而又未曾感染過水痘，就要小心提防，免受帶狀疱疹患者感染。曾感染過水痘嘅人唔會因接觸帶狀疱疹患者而受感染。
問：發現生蛇要點處理？
答：抗病毒特效藥可以縮短帶狀疱疹痊癒所需嘅時間，但必須響72小時內開始使用先有效果，故此如有懷疑應盡早求醫，並按醫生指示用藥。
另外，保持舒適嘅室溫，響患處搽紓緩藥膏或服食止痛藥，都有助減輕痕癢同痛楚。記緊保持患處皮膚清潔乾爽，千祈唔好自行弄破水泡，否則可能導致二度細菌感染。
多休息同埋飲用充足水分 ，以增強身體抵抗力。同時應該避免接觸體弱人士，例如孕婦和小孩，以免他們受到感染。
問：生蛇痊癒後會有後遺症嗎？
答：大概有四份一因「生蛇」而入院嘅患者會出現唔同程度嘅併發症，包括「生蛇」後遺神經痛。即使水泡結痂痊癒後，神經疼痛仍可持續數月或數年。痛楚好似被針拮或電擊，有時即使輕輕觸碰皮膚，患者都會感覺異常劇痛。另外，患處或者會出現色素沉澱，皮膚呈現瘀黑色，要幾個月先會消失，甚至永久不消散，嚴重者可能會留下疤痕。
問：生蛇會復發嗎？
答：生蛇有機會復發，雖然目前無一個準確嘅復發率，不過綜合各地研究，大約6%患者響第一次生蛇後會再復發，當中以女性居多。
問：生蛇可以預防嗎？
答：要預防生蛇，除咗改善日常生活習慣，維持作息正常、飲食均衡、心境平和之外，亦可以考慮接種生蛇疫苗（俗稱「蛇針」），臨床研究顯示接種疫苗後嘅預防率達5至7成。即使接種後仍有機會發病，但痛楚會較輕。詳情應向主診醫生查詢。