退化性膝關節炎｜50歲後關節慢性勞損　6招護膝方法預防退化

退化性關節炎係常見嘅長者疾病，而最常受影響嘅就係膝關節。隨住年紀漸長，關節液分泌減少，膝關節經長年累月嘅磨擦而勞損，軟骨變薄，唔少人響50歲之後，都會出現退化性膝關節炎嘅徵狀。

退化性膝關節炎係由關節慢性勞損而引起，如果加上保護關節嘅肌肉及筋腱疲弱、身體過重、唔正確嘅姿勢同活動，情況會變得更差。

退化性膝關節炎徵狀

– 最常見徵狀係膝部久唔久會痛，尤其是係走動後，特別係落樓梯、拎重物時

– 間中亦有膝部紅腫發熱

– 長期患者或會有關節僵硬，以致關節變形

治療退化性膝關節炎

如果患處出現紅腫發熱等急性發炎症狀時，可以使用冰敷減輕症狀。若痛楚較輕，無急性症狀如發熱發紅嘅，可以用熱敷紓緩痛楚。

藥物治療可以減少痛楚或減輕炎症，例如：服用止痛藥或使用止痛藥膏以減少痛楚；非類固醇消炎止痛藥則具有消炎同止痛作用，但副作用包括腸胃不適、腸胃潰瘍等，因此，患者必須按醫生指示使用。

若膝關節持續痛楚或痛楚影響日常活動，應該盡快求醫以安排適當治療。

6招預防和護理退化性膝關節炎

雖然退化性膝關節炎無得根治，不過透過治療同埋日常自我護理，可以減少因為關節勞損而引發嘅症狀、改善關節活動能，預防復發。

1. 保持理想體重，減少膝關節負荷

2. 避免攜帶過重物件，可利用手推車輔助

3. 避免長期站立或步行太久，有需要者應使用高度合適嘅助行用具

4. 避免膝關節長時間保持同一個姿勢，如長期坐矮櫈、蹲等

5. 平衡工作同休息時間，正視關節痛楚

6. 適當地強化大腿肌肉及膝關節運動能協助保護關節，詳情請教醫生或物理治療師