打邊爐食丸要慎選！消委會指5粒魚蛋已高鈉 加工食物樂齡人少食為妙

天氣凍，打返個暖笠笠的邊爐最適合不過，好多人打邊爐都鍾意食丸，不過丸其實係加工食物，消委會早前就有報告指好多丸都屬高鈉，多食無益，大家打邊爐時要慎選食材呀！

消委會測試市面上5類共60款預先包裝同散裝肉丸樣本，發現當中7成半 (45 款)肉丸樣本屬「高鈉」食物，而魚蛋類樣本檢出的平均鈉含量最高，食5粒魚蛋已經高達819毫克鈉，佔世界衞生組織建議每日鈉攝取量上限 (2000毫克)的41%。

消委會：7成半肉丸屬高鈉食物
60款肉丸樣本的鈉含量介乎366毫克至1260毫克 (以每 100 克計算)，參考食物安全中心的建議，當中7成半(45 款樣本) 屬於「高鈉」食物 (即每100克食物含超過600毫克鈉)。5類肉丸的平均鈉含量，以貢丸最低，有568毫克，其餘4類肉丸都則屬於「高鈉」，以魚蛋平均鈉含量最高，有成814毫克，至於龍蝦丸、牛丸同墨魚丸就654毫克至794毫克。

魚蛋鈉含量最高
鈉含量最高的一款魚蛋樣本，進食一粒就會攝入163.8 毫克鈉。以一碗魚蛋粉5粒魚蛋來計算，淨係魚蛋的鈉含量已達819毫克，佔世衞建議成人每日攝取上限 (2000 毫克) 的 41%。參考消委會過去有關亞洲風味湯麵的測試報告，假設湯底的鈉含量係1080毫克，如果將成碗魚蛋粉連湯食完，一碗粉已經攝取了2013毫克鈉，超過成人每日攝入量上限。

加工食物高鈉高脂少食為妙
丸類屬於加工食物，而加工食物通常都都係高鈉高脂，如果無節制咁食，有機會攝入過量脂肪同鈉。香港人鍾意打邊爐，假設每款丸都食2粒的話，已經攝入差唔多18.1克脂肪，大約係世衞建議每日上限的27%；而鈉攝入量就大約1438毫克，連同蘸點醬油的鈉攝入量約 356 毫克，達世衞建議每日上限約9成！

鈉攝取過多有機會導致血管僵硬，引起高血壓、中風、心臟病、心臟衰竭等問題，同時造成腎臟負擔，甚至可能令鈣質流失。人到中年想維持健康，一定要慎選食物，避開加工食物、多吃原型食物，病痛就唔會成日搵上門。

(圖片來源：消費者委員會)

相關閱讀：改善身體慢性發炎 避開5大發炎食物