點解年紀愈大愈易失眠? 改善長者失眠 8大辦法:瞓唔著就起身,唔好夾硬迫自己瞓!

長者失眠係一個好常見的問題,中文大學的研究發現,超過7成的70歲或以上長者,認為自己有睡眠問題,有3成更覺得自己受失眠困擾,而女士同長期病患者較常失眠。不妨試試以下8個方法,改善長者失眠。

改善長者失眠

徹夜難眠、起碼用30分鐘以上先可以入睡、容易醒、醒來後難以再睡著,如果一星期有3日以上出現以上情況,並持續超過3個月,而情緒受到影響的話,就可以算係失眠,長期失眠會影響身心健康。

至於點解年紀愈大,愈容易失眠呢?咁係因為隨住年齡增長,身體減少分泌褪黑激素,令人體的生理時鐘被打亂,所以長者一般都比較淺眠同早起床。另外,痛症或尿頻等問題亦會睡眠質素。加上好多長者退休後,活動量大幅減少,又有瞓晏覺習慣,令到晚上更加難入睡。

改善長者失眠8大辦法

1. 維持規律作息,每日準時睡覺同起身。

2. 少飲含咖啡因的飲品,傍晚過後盡量避免飲用,因為過量咖啡可能導致失眠。

3. 睡前兩個鐘唔好飲太多水,避免夜尿、尿頻,影響睡眠質素。

4. 朝早多做運動消耗體力,夜晚更易入睡;同時可避免日頭太得閒成日瞓晏覺,搞到夜晚瞓唔著。

5. 營造舒適的睡眠環境,睡房燈光宜採用暗淡的黃光,窗簾要有效遮擋清晨陽光,避免被陽光刺醒後無法再入睡。

6. 培養睡前儀式,每晚瞓覺前做一些令自己放鬆的事情,例如浸腳、冥想、呼吸練習等等。

7. 睡床係瞓覺的地方,要令腦袋見到睡床就聯想到瞓覺的話,就要避免響床上做睡眠以外的事情,例如玩手機、睇書、煲劇等。

8. 唔好強迫自己瞓覺,如果躺在床上超過20分鐘都瞓唔著,建議暫時離開睡床。因為愈瞓唔著,愈容易產生焦慮情緒,無意中將睡床同焦慮連結起來,反而加劇失眠情況。

相關閱讀:50歲睡眠時間 瞓太多或太少會影響壽命? 65歲以後瞓5個半鐘可延緩大腦老化?