糖尿病患者可以飲湯嗎？ 糖尿病湯水4大注意事項 滾湯好過老火湯 (附禁忌食材)
香港人鍾意煲老火湯或者燉湯，但經長時間煲煮的湯水可能比較油膩、甜，而且有粉狀沉澱，比起老火湯，其實偏向清淡的老火湯更為適合糖尿病人。以下係糖尿病湯水的一些注意事項：
糖尿病湯水4大注意事項
1. 用脂肪含量低的肉類
老火湯的材料通常有：大量肉類、骨頭、根莖、棗類、藥材，煲煮兩三個鐘後，湯水裡面會包有大量脂肪同糖分。好多人以為響煲湯之前，將肉和骨出水就可以去除脂肪，但其實唔少脂都係藏響骨髓同肌肉裡面，短時間出水好難將脂肪去除。比較理想的做法係避免用肥肉同骨頭煲湯，以少量瘦肉、去皮去膏的家禽、魚來代替，煲魚湯時要留意唔好用太多油煎魚，並應選用植物油，同埋飲之前最好隔油。
2. 可用少量海味
有些人愛用海味煲湯，例如：花膠、海參、鮑魚、螺片、章魚、蠔豉、瑤柱等等，由於用量少，而且脂肪含量唔高，再配搭一些清淡的瓜菜、菜乾、瘦肉，都係理想的湯水。
3. 藥材湯宜少喝
好多藥材本身含有碳水化合物，如沙參、花旗參、淮山、蓮子、百合等，煲煮兩三個鐘後，碳水化合物完全釋放，多飲無益，建議飲一碗就夠。
4. 避免放太多棗類
棗類味道甜，唔太適合糖尿病人，如果一定要加的話，每人份量不應多過半粒，假設4人份的湯，只可放2粒紅棗，而每人飲用量每人不可多於一碗。
老火湯雖然好味，但為健康著想建議都係滾湯，滾湯時間短，只要慎選煲湯材料，唔好太油太甜太肥，會比老火湯更健康。