陪父母走人生最後階段： 陪伴臨終父母 坦誠講真心話 讓臨終者感受愛與尊重 同時減少在世者遺憾
父母年紀漸長，健康每況愈下，甚至已經長期臥病在床，生命彷彿進入倒數階段，睇住親人生命逐漸消逝，點樣 陪伴臨終父母 ，先可以令他們響離世前感到愛同關懷，亦可以減少在世者將來遺憾？
陪伴臨終父母 4大要點
1. 讓臨終者感受愛、關懷、尊重
年邁父母感覺到自己生命正走向盡頭，難免會有好多情緒，例如憂傷、絕望、挫折、憤怒等等，當臨終父母出現各種情緒時，我們可以做的就係尊重，千祈唔好否定或批評他們的感受，比起積極鼓勵，臨終更需要認同，拖住他們的手，講聲「辛苦喇」，靜靜陪伴，等他們知道你的關懷更勝千言萬語。
另外，多抽空陪伴臨終父母，一齊閒話家常、幫他蓋蓋被、梳梳頭髮等，都係表達關懷同愛的小舉動。
2. 坦誠講真心話
即使隱瞞臨終者病情，他們大概都會感受到自己時日無多，不如坦誠地跟對方講清楚狀況，等他做好身心準備，如果他願意的話，也可以將未了的心願、想要的後事儀式一一告知。
我們亦要把握時間講出真心話，唔好怕肉麻尷尬，無論係對對方的愛、感謝，或者係道歉都好，永遠唔會遲，即管詳細具體地同臨終父母講，互換最深層的感情。
3. 完成未了心願
臨終者面對快將來到的死亡時，可能會好急切想要完成某些心願，例如想返屋企睇睇、同某個鬧翻了的親友和解、搵返某樣失去了的物品等等。我們應耐心聆聽臨終者的心願，盡量幫他達成。如果當下真係無辦法完成，可以請他將心願或者想對某人講的說話錄下來，向他保證會盡力圓其心願。有時可能到最後也無辦法實現心願，但當臨終者講出心事後，成個人會輕鬆得多，大大減少不安同焦慮。
4. 好好道別
臨終父母即使已接受自己即將逝去，但可能對世間亦有牽掛，唔放心仍然在世的屋企人，為了令臨終父母可以安心離去，我們不妨跟他好好道別，答應他我們會好好照顧自己，並且互相扶持，讓他放心。
可以試下咁講：「我好幸運可以做到你仔女，多謝你生我養我，雖然好想永遠同你一齊，但我都唔捨得你病得咁辛苦，我信你將會去一個無病無痛、幸福快樂的地方，我會永遠記得我們相處的回憶，你放心啦！我會好好照顧自己，唔使太掛心我。」
要講依番說話可能並唔容易，但好好道別可以給予臨終者力量，讓他安心地離開，而在世家人亦比較唔會留有遺憾。