同父母傾身後事 與長輩談死亡的6大原則 注意傾談時氣氛 別令對方覺得被暗示就快死
想同年邁父母談死亡，但唔知點開口？長輩主動提起身後事，但你因為未準備好而唔知點回應？生老病死係自然不過的事，及早做好功課同心理準備，把握機會同長輩傾傾，掌握以下6個原則，會更加容易開始。
同長輩談死亡 6大原則
1. 提到死亡時，以「他死」來代替「你死」
華人對死亡多少有些忌諱，談死亡時如果常常提到「你死」，可能會令長輩不快，覺得被提醒即將死去，但如果以「他死」的方式代替，討論別人的事的話，長輩或許比較能放寬心講出內心想法，不妨藉著名人患病或去世的新聞，同長輩打開話題。
2. 多了解長輩背後的原因
談死亡時，唔單止係交代身後事咁簡單，大家可以抱住交流分享的心態，例如長輩想海葬的話，可以試試了解其背後的原因，尊重長輩的選擇。
3. 注意交流時的氣氛
交談的氣氛應該是輕鬆舒服，如果發現長輩不停岔開話題，唔想繼續傾的話，就應該先暫停，下次再搵機會傾，最緊要有耐心，唔好急住一次講完。
4. 肯定同稱讚
當長輩主動講起死亡，可以給予肯定同稱讚，避免批評他們的想法。
5. 抱有同理心
唔係人人都能夠坦然面對死亡，如果長輩仲未有心理準備開口提及，要理解同尊重長輩的感受，千祈唔好強迫。
6. 同長輩討論之前要做好準備
關於死亡，有林林總總的事情要預備，響同長輩傾談之前，不妨做點功課，粗略了解一下相關知識，例如遺囑、喪禮儀式、殯葬方式等。當長輩想傾的時候，就唔怕錯失機會。