美荷樓生活館翻新 新增10個展區重現50、60年代生活 雜貨舖糴米/ 天台學校做早操
位於深水埗嘅美荷樓生活館早前已經翻新完畢對外開放喇！翻新後嘅生活館新增咗10個主題展區，仲有多媒體互動體感遊戲，令遊客彷如時光倒流返到50、60年代！
美荷樓屬於香港二級歷史建築，佢嘅誕生源於1953年12月25日夜晚響石硤尾發生嘅一場大火（後通稱「石硤尾大火」），大火令到接近58,000人喪失家園。為咗向災民提供長期嘅房屋設施，包括美荷樓在內嘅首批8座六層高嘅徙置大廈應運而生。美荷樓生活館就紀錄住當年嘅社區歷史、公屋環境以至巿民生活習慣嘅轉變，別具意義。
生活館嘅新地下展廳增設咗10個主題展區，包括大牌檔、雜貨舖、涼茶舖、遊樂場等，響依度可以睇得到50、60年代基層市民嘅日常生活，例如糴米、擔水、食嗱喳麵、彈波子等等，將舊日歲月重現遊客眼前。
而一樓展廳就有街坊口述歷史，仲展示咗徙置大廈單位內擠逼嘅環境，包括一屋兩戶、單位內有「閣仔」等等，亦增設介紹天台小學、家庭手作工業嘅展區。另外，館內亦增添咗唔少多媒體互動體感遊戲，遊客彷如親臨當年徙置大廈天台學校，跟住老師做早操，回味童年往事。
美荷樓生活館
地址：九龍深水埗巴域街70號石硤尾邨41座
開放時間：
星期二至星期日及公眾假期 — 上午10時至下午6時
中秋節、平安夜及農曆新年除夕 — 上午10時至下午4時
星期一（公眾假期除外）、農曆年初一至初三 — 休館
前往方法：
地鐵
深水埗站B2出口，沿北河街步行往石硤尾方向，穿過行人隧道後轉左，沿巴域街斜路抵達美荷樓
石硤尾站A2出口，沿窩仔街步行至白田街，轉左行至巴域街，沿右邊斜路抵達美荷樓
九巴
經窩仔街：2D、6D、104（九巴／新巴）
經南昌街：2B、2E、2F、86、86A、86C、87B、214
經大埔道：72、81
經北河街：6、6C
網站：按此