禁止跑跳碰撞的「步行足球」？只限50歲以上參加 92歲婆婆上課後唔使再用拐杖
有一種運動，只限50歲以上人士參加；雖然係踢足球，但唔准跑唔准跳。聽落好似好多規矩，但參加人數近年有增無減，玩過嘅人都十分鍾意。依項運動就係「步行足球」，你又有無聽過呢？今次找來「步行足球」教練劉以薰 (薰Sir) 同大家分享，有興趣參加的話，就要睇到最後！
不准跑跳碰撞的「 步行足球」
擔任足球教練多年嘅薰Sir，2016年經朋友引薦為YMCA推廣「健步足球」。依項新興嘅樂齡足球運動起源於英國，由車士打菲特一個地方球會發明，最初係為有長期病患嘅長者而設，規例有別於正統足球，以安全為主，規定不能跑、不能跳、不能碰撞，亦不能踢球高於6呎等。
薰Sir指，所有有身體接觸嘅對抗性運動都難免有危險，隨住年紀身體機能逐漸減弱，應當避免太劇烈容易受傷嘅運動，而步行足球正正適合樂齡人士，可大大降低意外風險。
92歲婆婆都踢步行足球
由於步行足球只限50歲以上人士參加，剛開始推廣時唔少學員都因為好奇而前來一探究竟。步行足球不限性別，男女都可以玩，但薰Sir留意到大部份女學員對足球不甚了解，如單以比賽為目標來進行訓練，難以令學員持續參與，於是他將教學重點集中在提高學員興趣，觀察他們的身體狀況，並特別著重運動嘅安全性。
經過多次互動授課后，薰Sir體會到：「只要令佢哋開心高興地踢波，佢哋就會主動積極地參與，更會熱情投入，慢慢地就成為一個互相關懷嘅群組。」雖然步行足球規例較多，且有別於傳統足球，但薰Sir認為只要學員享受過程，那些規則可以通過解釋和練習讓學員慢慢適應。
運動雖設有年齡限制，但就無年齡上限，薰Sir教過最年長嘅學員係一位92歲嘅婆婆，他指婆婆係「三隻腳來上課，兩隻腳回家」，因為起初婆婆係撐住拐杖來上堂，但經過連串練習後，最後竟然可以不靠拐杖走路。
「分享經驗、分享喜悅，一齊健康愉快」
多年累積下來的經驗，令薰Sir深感步行足球對樂齡人士的好處，決心致力作多面向推廣。他指自己不斷改善依項運動嘅發展方向，「除按照規例進行訓練外，仲可以用某些運動動作，等其他唔想參加比賽嘅樂齡人士更加投入，更加有樂趣。」
走過40年教練生涯，薰Sir唔單止教足球，更加係一位器械健體教練，他回想起1991年時曾參與教導長者做徒手健體操，當時只有30幾歲的他獲學員尊稱為「師傅」，他說：「我感覺怪怪，因自己太年青了，我就同學員講，係『孫仔教運動』。」廿多年後，再一次有機會教授年長人士，只是如今薰Sir也是樂齡一族，感受自然大不同：「自己也踏入耆英之年，而家嘅授課過程我係與衆分享，分享我嘅教學經驗，亦係分享學員嘅喜悅，從而大家一齊健康愉快。」
薰Sir現時成立了香港步行足球協會，在港九各個戶外五人足球場繼續發展步行足球，佢亦將運動規則稍為修改，以更適合在標準五人場內進行。薰Sir逢星期四會在土瓜灣海心公園內進行活動，星期二偶爾亦會在麥花臣球場進行，有興趣參加嘅島友可以去佢哋嘅Facebook專頁 (按此) 了解詳情。