踏入50歲 中年保險規劃3大考慮要點 照顧好自己同家人！需要為下一代買幾多款保險？
50歲話大唔大、話細唔細，開始面臨各種人生難題：要照顧年邁父母、養育子女，同時又要思考退休後的醫療同養老問題。唔少人會購買保險作為老後保障，到底 中年保險 要點規劃呢？
相關閱讀：三文治世代 | 50、60歲中年人照顧上下兩代 疫情下壓力爆煲 3方法保持身心健康 唔好咩都攬上身
中年保險 規劃 3大考慮要點
相信唔少50歲以上的朋友都買過保險，但有些保單可能好早前就買落，之後從來無調整過，可能未必最符合現時需要。各位樂齡朋友不妨檢視一下現有保單，再根據家庭狀況同埋自身價值觀作出規劃。
1. 經濟狀況 — 定期壽險 或 終身壽險？
如果係經濟負擔比較大的家庭，可以考慮定期壽險為主，因為保費便宜，投保年期亦比較彈性。不過由於醫療保險到年老後的費用會上升，所以必須做好好理財規劃，響醫療開支預算同退休金安排之間取得平衡。如果係經濟充裕的家庭，就可以考慮購買終身壽險。
2. 家庭狀況 — 要為下一代規劃幾多款保險？
50歲以上人士規劃保險時，好多少都會著眼響下一代身上，為他們購買各類保險，但就忽略了幫自己的需要。中年人的保險規劃，最好以家庭做單位來作整體規劃，為下一代準備基礎的醫療保障即可，其餘的可以等年青人自己安排。
身為父母，首要任務係檢視未來風險，並作出妥善規劃，咁先可以避免因自己無做好保險規劃，將來帶給下一代沉重的照護開支負擔。規劃人壽保險時，可思考以下幾點：家庭主要經濟來源係邊個、喪偶時可能增加的開支等，再做保額安排。
3. 健康狀況 — 有疾病要誠實告知
50歲以後，身體多多少少都會有些健康問題，投保前應該誠實告知，可以避免日後糾紛，影響保險效力。
一般來說，保險公司得知投保人的健康狀況後，會有4種可能性：
– 正常承保，如盲腸切除
– 加費承保，如高血壓
– 除外承保，如胃潰瘍 (保險公司不予賠償的項目)
– 拒絕承保，如糖尿病。
如果真係因為健康狀況而無法購買醫療保險的話，咁就必須加強儲蓄理財，或者可以考慮儲蓄保險、年金保險、意外保險等等。如果家人所屬公司有提供團體醫療保險，而又唔需要提交健康聲明的話，可以優先選擇加保。