11月6號免費搭巴士！《飯戲攻心》票房破7200萬 請全港市民全日任搭2條巴士路線
由黃子華、鄧麗欣、張繼聰、王菀之、陳湛文同林明禎主演的《飯戲攻心》，早前響Facebook專頁上宣佈，票房衝破7200萬，入場觀眾超過100萬，即係每7個香港人就有1個人睇過電影。為答謝大家的熱情支持，電影公司將會響11月6號請全港市民免費搭巴士！
電影公司指：「多謝大家帶《飯戲攻心》行到咁遠！而家係時候到《飯戲》一家人陪各位攻心粉一齊行遠啲，請大家11月6日無限次搭巴士！」當日全日可免費任搭兩條巴士路線。
《飯戲攻心》免費巴士詳情
日期：2022年11月6日
免費乘搭路線：
1號：尖沙咀←→竹園邨
108號：啟業←→寶馬山
導演陳詠燊話：「7000萬係好很夢幻的數字，感謝每一位支持我們的觀眾。關於搭巴士，我相信我係團隊中搭巴士最多的人，所以請大家搭巴士係最貼地的答謝方法，希望大家搭得開心。」
男主角黃子華憑住《飯戲攻心》亦終於一洗「票房毒藥」的污名，他說：「我已做了18年票房毒藥，每次代表電影走出來，都唔想大家針對我依方面，忽然有7000萬的數字，同時讓我諗起英國演員Ricky Gervais在頒獎禮上提醒演員，其實無人緊張你，得獎只要講聲多謝就可以走落台，所以我唔會太囂張，獲得7000萬應該自己暗暗開心，大大聲多謝大家。7000萬代表了100萬名觀眾入場，依個感覺好大，我感受到100萬人的歡樂，他們的感動，對我來說係好實在，我們同依100萬觀眾係緣份，我們請大家搭巴士都係應該。」