芳艷芬免費展覽 回味花旦王百變形象時裝品味 13/1前電影資料館展出
香港電影資料館最近宣佈展覽「芳姿綽約─水銀燈下的芳艷芬」展期會延至2023年1月13日，費用全免。展覽以「花旦王」芳艷芬響電影中嘅服裝造型為主題，等大家可以回味佢百變形象背後嘅時裝品味。
現年96歲嘅芳艷芬，10歲開始學習粵劇，16歲擢升正印花旦，創下細膩柔美嘅子喉「芳腔」。芳艷芬之後涉足影壇，從處女作《花落紅樓》（1950）到1959年婚後息影，10年間演出近150部作品。佢嘅銀幕形象百變，無論時裝定古裝、喜劇定文藝片，佢嘅角色都大受歡迎。戰後粵語歌唱片大盛，唔少由佢演唱嘅小曲更成為膾炙人口嘅流行曲。芳艷芬息影後，響80年代復出並致力公益事業，數度義演粵劇。2017獲頒金像獎終身成就獎。
「芳姿綽約─水銀燈下的芳艷芬」展覽由遊走於商業及藝術的策展人、金馬得獎服裝指導張西美參與籌備，從幾十部時裝電影，特選當年時興、今日仍然優美嘅幾個造型，向觀眾簡單介紹芳姐嘅衣著特色。
著名時裝設計師鄧達智曾經講過，50年代粵語片最佳衣著非芳艷芬莫屬，想重溫芳姐響電影中展現嘅時尚品味，就唔好錯過展覽喇！
「芳姿綽約——水銀燈下的芳艷芬」展覽
日期：即日起至2023年1月13日
星期一、三至日 — 上午10時至晚上8時
聖誕前夕及農曆新年除夕 — 上午10時至下午5時
（星期二（公眾假期除外）、農曆年初一及二休館）
地點：香港電影資料館一樓大堂 （香港西灣河鯉景道50號）
費用：免費參觀
查詢：2739 2139
網站：按此