樂悠咭常見疑問｜64歲前申請了樂悠咭，而家年滿65歲，需要換長者八達通嗎？

最近發現唔少朋友都有依個疑問：「本身用緊樂悠咭，而家夠咗65歲，仲可以用樂悠咭嗎？定係要換長者八達通先能夠繼續享用$2乘車優惠？」

答案係：「唔使換咭，繼續用樂悠咭就得。」

2元乘車優惠本身只提供畀65歲或以上人士，但由2022年2月27日起，2元優惠計劃嘅合資格年齡降至60歲，60至64歲香港居民必須使用樂悠咭以享用優惠。

而65歲或以上人士，雖然之前一直都係用不記名長者／個人八達通卡來享用2元優惠，不過將來都需要使用樂悠咭先有優惠。因為政府舊年宣佈，65歲或以上香港居民必須於指定期内，分階段申請樂悠咭，以繼續享用2元乘車優惠。

政府表示稍後會公佈取消長者八達通卡及個人八達通卡享用2元乘車優惠嘅日期 (暫時未有確實日期)，現有不記名租用版長者八達通卡或個人八達通將不能再享用優惠。鑑於長者八達通長遠來說係會被樂悠咭取代，所以現時已經有樂悠咭嘅朋友，即使年滿65歲都唔需要更換為長者八達通，繼續用樂悠咭就得。

反而而家用緊長者八達通嘅朋友要留意日期申請樂悠咭，八達通公司提醒65歲或以上首次申請樂悠咭嘅人士，需按下列指定日期分階段遞交申請。如沒有依照申請時間表申請，其申請將可能被延遲或不獲處理。