TreasureDo Whatsapp Group

樂悠咭 長者咭有咩分別?享用優惠有唔同!65歲或以上先可以同時擁有兩張咭?

最近發現唔少樂齡朋友都好易搞亂樂悠咭 長者咭的分別,尤其係政府宣佈未來將取消現有不記名長者八達通卡,65歲或以上人士都需要申請樂悠咭,有些樂齡朋友更加係亂上加亂。而家就為大家講解樂悠咭、長者咭、長者八達通的分別啦!

樂悠咭 長者咭

樂悠咭:60歲或以上可申請 享用2元乘車優惠

樂悠咭係專為60歲或以上香港居民而設的個人八達通卡,持有人可以每程2元的優惠票價,乘搭指定公共交通工具,例如港鐵、巴士、小巴、渡輪、電車等。當60至64歲樂悠咭持卡人年滿65歲時,都可以繼續用樂悠咭享用2元乘車優惠計劃。

相關閱讀:詳細教你申請樂悠咭!60歲可享2元乘車優惠

樂悠咭 長者咭-65歲

長者咭:65歲或以上可申請 享用多個機構商店優惠

年滿65歲或以上的香港居民就可以申請長者咭,享用政府部門、公共運輸機構同埋商號為長者提供的優惠票價、折扣同優先服務,唔少銀行、酒店、餐廳都有參加「長者咭計劃」。

相關閱讀:滿65歲點樣申請長者咭?3個途徑 逐個step教你做!

樂悠咭 長者咭-長者八達通

長者八達通:即將被樂悠咭取代 

而家好多65歲或以上人士都係用不記名的長者八達通卡或者一般個人八達通卡,來享用2元乘車優惠,不過政府一早計劃以樂悠咭取代不記名的長者八達通,早前就宣布由今年(2022年) 6月1日起至明年10月底,分階段接受65歲或以上合資格香港居民申請「樂悠咭」。等大家都完成過渡後,就會取消不記名的長者八達通,到時所有合資格人士必須使用「樂悠咭」才可享用2元優惠。

如果而家係用不記名長者八達通卡的樂齡朋友記得要去申請樂悠咭,先可以繼續享用2元乘車優惠。八達通公司新增了「樂悠咭」申請服務專線:3147 1388,如果有咩唔明都可以打去問。