7.7 Anson Lo生日請65歲或以上免費坐巴士！掃埋QR Code 後援會仲會捐款予慈善團體
MIRROR成員盧瀚霆 Anson Lo（教主）7月7日27歲生日，其粉絲「神徒」們準備咗一系列生日應援活動，繼早前宣佈請全港市民搭天星小輪同埋坐摩天輪，今日又宣佈會請65歲或以上長者免費坐巴士！
Anson Lo的後援會公佈，會同九巴合辦長者免費乘車日，響7月7日教主生日當日，65歲或以上長者持有效長者八達通卡及八達通產品，就可以免費坐九巴所有獨營路線（聯營路線、K12、K14、K17、K18、P960 及 P968 線除外），屆時各巴士車窗前會放置告示牌，以顯示優惠係咪適用於該路線。
長者乘搭時須以「長者八達通卡」或八達通產品繳付車資，10個工作天後至30個工作天內以八達通搭巴士、消費或增值，車費回贈即自動存入八達通。另外，當日全線九巴將貼有QR Code， 乘客每掃一次QR Code， Anson Lo 盧瀚霆國際後援會就會捐出港幣$1畀10間本地受惠機構（上限為港幣$27萬元正）。