52年漢榮書局除夕結業 疫情經營困難＋年紀大身體勞損 71歲負責人：最好的時間、留下美好
1970年開業、響香港屹立超過半個世紀嘅漢榮書局，早前宣佈將會響今個星期六（2022年12月31日）結束門市營業。雖然可惜，但負責人之一石漢基表示，希望響最好嘅時間結束書局，留畀大家美好嘅回憶。
漢榮書局1970年響旺角奶路臣街開業，千禧年代搬到彌敦道，52年來專營教科書，號稱響漢榮係無搵唔到嘅教科書，相信好多島友無論係幫自己定係幫仔女買書，都響依度留低唔少腳毛，聽到結業消失都好唔捨得。
71歲嘅負責人石漢基話，疫情經營困難重重，好多學校、教育局都推電子教學，影響書本零售業務，佢認為教科書書店前景黯淡。加上幾位負責人都已經全部超過60、70歲，工齡長達40幾年至60年，長時間嘅辛勞令身體造成勞損，所以希望響最好嘅時間結束實體書店，保住公司名聲之餘，亦留畀大家美好回憶。
雖然唔捨得，但石漢基將今次結業睇成學習「放下」嘅一課。佢直言要面對現實，唔可以係咁回想過去，最重要係點樣做好將來，做人就會輕鬆啲，否則太多包袱只會辛苦自己。