fbpx Web Interstitial Ad Example

和尚跳海  超懷舊茶餐廳經典飲品  樂齡人記得嗎?

大家仲記得「和尚跳海」嗎?依樣算係茶餐廳超懷舊又經典的飲品,各位樂齡人以前係咪成日飲?

懷舊, 和尚跳海

和尚跳海即係滾水蛋,材料如其名,只有滾水同雞蛋,將生雞蛋打入一杯滾水裡面,蛋黃圓轆轆光禿禿,好似和尚的光頭;而蛋白在滾水中被燙熟,形似和尚飄落的袈裟,「和尚跳海」因而得名。飲的時候加入白糖,然後將蛋黃同蛋白攪拌均勻,熱水同生雞蛋混合變成淡黃色,味道有少少似淡味版本的的雞蛋糖水。

舊時香港生活環境比較貧窮,一杯滾水蛋就係當時便宜又營養的食物。不過時至今日,現代人物質豐富又注重健康,擔心生雞蛋有細菌問題,愈來愈少人飲滾水蛋,一般茶餐廳都唔會搵到,只有在舊冰室,或者以懷舊做主題的茶餐廳先會搵到,例如土瓜灣永香冰室、上水廣成冰室、中環蘭芳園、商場「618上海街」裡的阿銀冰室都仲搵得到,一杯大約$18-$24左右。不過有舊冰室老闆話,雖然餐牌上有滾水蛋,但幾乎無人問津,兩三星期先賣出一杯。

懷舊, 和尚跳海

今日再飲滾水蛋,大概都只係飲一份回憶同情懷。大家有無懷念滾水蛋味道,好想飲下呢?你仲記得哪些茶餐廳經典飲品呢?不如留言大家一齊想當年!

相關閱讀:突然想念,消失了的飛機欖