告別珍寶海鮮舫！1976年開業相當輝煌 英女皇、湯告魯斯都去過 2020年停業至今 將於6月移離香港
停業兩年的珍寶海鮮舫下月將移離香港，雖然曾經計劃無償捐贈海洋公園，但最後未能成事。珍寶海鮮舫的海事牌照會響今年6月到期，因估計受疫情影響短期內無法復業，所以決定移離香港。
1976年落成同開業的珍寶海鮮舫，有過相當輝煌的歲月，曾經貴為全世界最大的水上餐廳，接待過唔少國際貴賓，連英女皇伊莉莎白二世、影星湯告魯斯、鞏俐、周潤發等等都係座上客，周星馳的經典喜劇《食神》亦係響度取景。
除了係外國旅客來港的必到景點，開業40幾年的珍寶海鮮舫更加係幾代香港人的回憶，駁艇、魚池、龍椅，餐廳裝修金璧輝煌，令人印象難忘。
珍寶海鮮舫2020年暫停營業後一直未有復業，響2020年底，珍寶王國的母公司香港仔飲食集團曾經打算將珍寶王國無償捐贈予海洋公園營運，成為「躍動港島南」計劃的一部份，但海洋公園因為搵唔到適合的第三方機構營運，所以無落實到捐贈計劃。
香港仔飲食集團之後亦同10幾間企業同機構商討無償捐贈珍寶海鮮舫，但由於對方都認為經營成本太高，所以未有成事。響停業兩年間，香港仔飲食集團每月都需要花幾百萬為珍寶海鮮舫進行檢查、維修同保養，以滿足牌照及其他要求。集團響檢視過之後，認為響目前經濟環境下係個沉重的財政負擔，而且受疫情影響，預料短期內復業無期。
加上珍寶海鮮舫的海事牌照會響今年6月到期，但香港目前無船廠泊位可供停放珍寶海鮮舫，未能為海鮮舫進行每3年一次的大型檢查同維修，所以決定移離香港，集團而家物色緊適合泊位以減輕成本，進行所需檢查、維修同存放，同時等待新經營者出現，為海鮮舫搵新出路。
諗到以後去香港仔再見唔到珍寶海鮮舫，感覺就好似一個時代的終結，不勝唏噓。