72歲黎彼得去年「通波仔」執返條命 嫖賭飲吹全戒掉 坦言被迫聽話個心囉囉攣
72歲的黎彼得（Peter）早前出席ViuTV新劇《極度俏郎君》開鏡拜神儀式，他舊年入院「通波仔」，今次係他康復後首次參與開鏡儀式，精神唔錯的他表示已戒掉所有壞習慣，飲食比以前健康。
Peter透露舊年因為眼腫而去做身體檢查，發現原來腦部有血管收窄，幸而無大礙，不過心臟有兩條血管阻塞，就要做「通波仔」手術。Peter接受傳媒訪問時表示，做完手術後有一段時間無工開，好在有契仔黃宗澤幫忙生活費，同埋富商劉鑾雄資助，先得以渡過無收入的日子。
手術後，Peter相當注重健康，決心戒掉所有壞習慣。他形容今次係執返條命，多謝醫生醫他，而家搵咗位陪月員煮三餐，有住家飯食、有湯飲，健康過以前日日食茶餐廳。他之前在電視訪問中話身體唔健康都係年齡問題，「去到咁上下年紀就要『派彩』，睇下你以前私生活檢唔檢點。」而家Peter自言嫖賭飲吹都戒曬，不過其實個心囉囉攣，只係被迫聽話，「都好想咩㗎！」
當主持問他體重有無增加時，他答道：「唔好增加喇！肥又死瘦又死，總之面色好就得，以前的老人家無端端會有幾聲咳，好彩我又無，咁已經好好彩，託賴。」
Peter近年成日響電視劇演甘草，大家仲記唔記得他另一身份其實係填詞人？響70、80年代幫過唔少巨星填詞，創造好多經典名曲，至今為超過200首歌填詞，歌神許冠傑的《打雀英雄傳》、《浪子心聲》、《財神到》；梅艷芳的《將冰山劈開》、張國榮的《Monica》等等，全部出自他的筆下，首首耳熟能詳，仲響2008年獲得CASH音樂成就大獎，以表揚他對樂壇的貢獻。
身為填詞人的他，中文詣藝相當高，所填的詞更加係雅俗共賞，但原來Peter童年過得並唔容易，自細喪父，又因為貧窮被迫響小學五年級輟學，但這些困難並未阻止他對中文的濃厚興趣，努力地半工讀，後來因參加徵文比賽而獲得在報章寫專欄的機會，再在朋友介紹下同許冠傑合作填詞，開啓了填詞人之路。