資深演員余子明病逝享年78歲 今年初缺血性中風 社交平台相片透露生前最後愉快日子
資深演員余子明病逝，享年78歲，他的兒子Elvin在社交平台公佈爸爸死訊，上載了一張子明叔坐在輪椅上望海的背影黑白照，寫道：「爸，一路好走」
今年1月，余子明曾經缺血性中風，左邊身癱瘓，需要坐輪椅代步。出院後努力療養，健康情況逐漸好轉，兒子Elvin更替他開設Instagram帳號，代為分享生活日常，這批相片透露了子明叔生前的最後日子。
大部份相片是係子明叔嘆茶食飯，又或者係包馬經賭馬的生活，亦有兒子Elvin替他剪頭髮的影片。雖然外出時要以輪椅代步，但從照片可見，子明叔屋企人帶他到處享受美食，Elvin亦為了陪伴爸爸，而特地安排每個星期三上晝都放假。
上月初先見子明叔外出精神奕奕地嘆咖啡又食炸魚，響屋企亦食得相當豐富，蒸魚、燒魚、燒鵝，甚至係壽司，拎住燒鵝髀的他表情相當神氣。子明叔在照片裡的表情相當鬼馬，Elvin亦留言指爸爸只要一見他舉起手機影相，就會變得好精靈。
上月底Elvin曾經出po指爸爸「叉滿電」，但身體明顯退步了，怕吞藥會濁親所以大粒的藥丸都要磨碎。一周前，Elvin又指爸爸有濃痰化不開，寫道：「上晝仲眼仔碌碌影相，下晝就叫車入廠維修。」原來係因為擔心爸爸患上肺炎所以入院檢查，當時Elvin接受訪問時表示子明叔腦筋清醒，不過無咩精神同氣力說話。估唔到只係相隔一周，子明叔已經離開人世。
余子明曾經為 TVB 效力多年，係資深的甘草演員，演出作品甚多，最經典角色為綜藝節目《歡樂今宵》「單吊西與大眼雞」單元中所飾演的「大眼雞」，以及《封神榜》中的姜子牙。除了演戲外，子明叔歌喉亦相當了得，曾經響1968年獲全港業餘歌唱比賽冠軍。
子明叔，願您安息，在世界另一方繼續唱歌做戲！