TreasureDo Whatsapp Group

62歲毛舜筠獲薩蘭托國際電影節殊榮:2022年最好的禮物 希望有更多好劇本 人人有工開

62歲的毛舜筠 (毛毛) 近日獲意大利薩蘭托國際電影節頒發 「Salento Cinema Actor Award-City of Tricase」奬項,以表揚佢出色的藝術成就,同埋對電影界的貢獻,得到殊榮嘅毛毛話依份係2022年最好嘅禮物。

毛毛響投身電影界超過40年,曾經憑《早熟》獲香港電影金像獎最佳女配角,2018年憑《黃金花》奪得金像獎影后、亞太影展最佳女主角獎、香港電影導演會最佳女主角,演技備受肯定。

毛舜筠

今次獲頒國際奬項,從意大利駐香港總領事費文浩手中接過奬項,毛毛話:「好榮幸、好開心,無諗過可以拎一個國際嘅獎項,所以好開心,係2022年最好嘅一份禮物。」

毛舜筠-薩蘭托國際電影節

毛毛表示早在1個月之前,經理人已通知佢領奬,佢仲話當時唔敢相信,掩住電話笑咗一陣,非常開心。毛毛兩個身在加拿大的囡囡,原來響佢領獎前一晚先知道依件事,毛毛話囡囡仲興奮過自己。佢打算等兩個囡返香港後,攞住個獎一家四口影張合照,食餐飯慶祝,仲搞笑咁話希望到時唔使佢下廚。而老公區丁平知道佢獲奬後,亦大讚:「你好威喎,依個獎好難攞。」

毛舜筠-老公-女兒

獲奬固然開心,毛毛亦承認奬項當然愈多愈好,係好大嘅鼓勵和認同,不過佢就無話仲有咩奬想拎,「獎項唔係自己安排,其實我個人嚟講從來都無目標,真心希望香港多啲好劇本,人人有工開,呢個係我最希望。我覺得而家係收成期,每次有獎攞都好開心。」

相關閱讀:50+明星拍片做Youtuber 鄭丹瑞、毛舜筠、歐錦棠都有份 大家有無睇過?