62歲毛舜筠獲薩蘭托國際電影節殊榮：2022年最好的禮物 希望有更多好劇本 人人有工開
62歲的毛舜筠 (毛毛) 近日獲意大利薩蘭托國際電影節頒發 「Salento Cinema Actor Award-City of Tricase」奬項，以表揚佢出色的藝術成就，同埋對電影界的貢獻，得到殊榮嘅毛毛話依份係2022年最好嘅禮物。
毛毛響投身電影界超過40年，曾經憑《早熟》獲香港電影金像獎最佳女配角，2018年憑《黃金花》奪得金像獎影后、亞太影展最佳女主角獎、香港電影導演會最佳女主角，演技備受肯定。
今次獲頒國際奬項，從意大利駐香港總領事費文浩手中接過奬項，毛毛話：「好榮幸、好開心，無諗過可以拎一個國際嘅獎項，所以好開心，係2022年最好嘅一份禮物。」
毛毛表示早在1個月之前，經理人已通知佢領奬，佢仲話當時唔敢相信，掩住電話笑咗一陣，非常開心。毛毛兩個身在加拿大的囡囡，原來響佢領獎前一晚先知道依件事，毛毛話囡囡仲興奮過自己。佢打算等兩個囡返香港後，攞住個獎一家四口影張合照，食餐飯慶祝，仲搞笑咁話希望到時唔使佢下廚。而老公區丁平知道佢獲奬後，亦大讚：「你好威喎，依個獎好難攞。」
獲奬固然開心，毛毛亦承認奬項當然愈多愈好，係好大嘅鼓勵和認同，不過佢就無話仲有咩奬想拎，「獎項唔係自己安排，其實我個人嚟講從來都無目標，真心希望香港多啲好劇本，人人有工開，呢個係我最希望。我覺得而家係收成期，每次有獎攞都好開心。」