蘇施黃大腸癌第三期 完成化療迎68歲 分享食標靶藥方法：用麵包夾住唔會爛口
即將迎接68歲生日我嘅蘇施黃，舊年10月發現患上大腸癌第三期，完成手術後要接受化療，佢近日就拍片同大家分享自己終於完成化療，勉勵有同樣經歷嘅朋友正面面對。
蘇施黃舊年10月響影片透露自己患上大腸癌第三期，並已完成手術準備化療。佢響依幾個月裡面做咗4次化療，每次入院打針後，再食14日口服化療藥。佢近日響個人頻道《教煮蘇 This is So good》開心地分享，歷時5個月終於完成所有療程，仲約埋朋友去屋企打麻雀慶祝。
化療副作用嚇親金燕玲
影片中佢身處醫院，表示今次係最後一次化療。回想返化療過程，佢指第一次時無咩異樣，但第二次情況就好慘，入院住足7日，屙嘔11日，由134磅跌到得返124磅，嚇親金燕玲。好彩出院後體重逐漸回升，而家都有132磅。
由於第二次療程副作用嚴重，所以第三次療程時蘇施黃停食口服藥，繼續食止嘔藥，點知又出現其他副作用，就係皮膚變到好乾，「腳摸落去好輆澀澀，好似打十字格，好核突。」
從8次患癌朋友身上學會樂觀面對
蘇施黃提到身邊有朋友患癌8次，雖然每次化療都好辛苦，但佢從來無抱怨過。即使依位朋友已經離開咗，但蘇施黃仍不忘響佢身上學到嘅做人態度，「冇聽佢怨過半句，亦唔見佢忟憎，笑口噬噬，好返啲會煮下野叫我哋上去食。呢啲態度要學，我成日話，你覺得自己病就係病，你覺得自己冇無野就係無野，呢樣要記住。我好似朋友咁，好啲會煮吓嘢，又去打乒乓波。」
而依位朋友亦教識蘇施黃點樣食標靶藥或化療藥，佢分享道：「唔好直接擺脷上，用麵包夾住，唔會爛口，雖然我無爛口，但條脷麻痺。」
望透過影片分享勉勵癌友
蘇施黃曾於2005年患上乳癌並康復，如今又患大腸癌，經歷兩次患癌嘅佢希望透過影片同大家分享，等大家了解化療期間可能出現嘅副作用，佢相信有咗心理準備之後，就會無咁驚，會睇開啲。佢又分享咗一段文字鼓勵大家：「絕望皆因沉溺於昨日、失望卻因不接受今日、希望源自積極向明日。」
而信仰亦幫佢渡過化療嘅辛苦時間，「響我病當中，最好朋友係上帝，成件事可以好輕鬆渡過，希望分享畀大家，生活輕鬆啲、人開心啲。聖經有講，箴言17:22『喜樂的心乃是良藥，憂傷的靈使骨枯乾。』」
祝阿蘇早日復原，癌症唔好復發！
