58歲單身盧覓雪唔強求婚姻:愛情就好似飯後甜品,好鍾意但可有可無

58歲盧覓雪成日被稱為「黃金盛女」,多年來一直單身。雖然一早過了適婚年齡,不過她坦言仍然渴望愛情,至於婚姻就急不來,寧願慢慢等待對的人,都唔想隨便嫁錯郎。

盧覓雪入行之前係雜誌社副總編輯,後來受邀加入商台做DJ,因為風趣幽默的表現,得到唔少幕前演出機會。她談吐有內涵,不拘小節,加上唔介意搞笑演出,一直以來好有觀眾緣,事業一帆風順。

愛情是一碗飯後甜品

事業得意,但係愛情麻麻,雖然拍過幾次拖,但年過半百仲係單身,依位才女笑言自己無亞洲人市場,不過就有外國人追求。問她點睇愛情?她說:「兩個人初初見面,只要彼此眼睛中都開花,心情異常雀躍,就係愛情。」以前盧覓雪都試過幾次「眼開花」,不過當年後生年少氣盛,個人情緒同感情都處理得唔好,搞搞下都係分手。有時她諗返轉頭,如果當時識得珍惜對方,今日會唔會有另一個結果呢?然而,依一切都只係假設,活到依個年紀,愛情而家對她來說就好似一碗飯後甜品,好鍾意但係可有可無。

盧覓雪-愛情

寧願單身都唔想嫁錯

講到婚姻,她就話隨緣吧。「我從來無諗過結婚,結婚係一個終身承諾。古時候女人要結婚,係因為要搵個男人養,但我需要男人養嗎?我自己都可以養自己,點解要強迫自己去揀一個男人?」而家離婚率高,她話寧願錯過愛情,都唔想隨便嫁錯人。目前她仍期望遇到對的人,不過一切交給緣份,她並不急。「我無因為愛情而唔開心,相反有些朋友成日為此煩惱同唔開心。」她認為人生除了愛情同婚姻,仲有好多事情值得開心,而家反而好珍惜單身的生活。

盧覓雪-貓

樂齡單身都可以過得好精采,盧覓雪得閒就同朋友去歎美食行畫展,屋企養兩隻貓作伴,生活一樣充滿色彩,唔會話因為無愛情就單調乏味。人生快樂的重點從來都係自己有無令自己開心,而唔係身邊有無多一個人,換個心態,單身一樣咁開心!

相關閱讀:《一個人的老後》單身樂齡女性 樂活晚年9式