鄭秀文50歲 生日即將至 無懼變老活得自在：年紀愈大愈能忠於自己 有時唔理得人太多
1972年出生的 鄭秀文50歲 生日即將至，早前接受資深傳媒人金成訪問時，大談即將邁入50歲的心境，以及對生離死別的睇法，Sammi那種從容自在的心態，同你有無幾分相似呢？
鄭秀文50歲 不覺是人生大事
被問到50歲對她來說係咪一件大事呢？Sammi笑說：「我覺得係無事。」人就係會長大、會變老，自然而然就來到50歲，會有老花、有白頭髮，都是很自然的事。
Sammi說她甚至好期待，「我前幾年仲未有老花，但身邊好多朋友無論男女都有老花問題，那時候我覺得自己好有問題，當個個都有老花、要戴眼鏡睇東西變得好自然，就顯得我(無老花)好唔自然，點解我對眼仲咁精靈？」
直到去年Sammi開始有老花，她開心得周圍同朋友分享：「我有喇！我終於有你們有的東西喇！」老花對她來說，係與朋友同步的一個證據，能夠「一起在年紀上同行」。
Sammi一直熱愛運動，她認為運動同延遲退化有關係，令她整個身心靈都唔似就快50歲。不過最重要都係保持心態年青，她形容自己個性比較原始，「心中蹦蹦跳，心裡住著一個小女童，我應該到70歲都係咁，個性本質就係咁。」
Sammi響1990年代走紅，2000年更加係歌影事業的巔峰期，回顧事業頂峰，Sammi卻覺得那時候遺忘了真正的自己，成日都維持住一個繃緊狀態，著緊高低起跌，成個人的神經系統都被成功與否牽動住，「回望(那段日子)係自己最唔開心的時候，事業成功，但人卻無法開懷，那些年月最唔開心。」
她坦言直到人生慢慢去到另一階段，經歷過抑鬱症和很多生活上大大小小的事情，才慢慢還原真正的自己，「愈活得耐，愈還原真正的自己，依件事相當有趣。」
年紀愈大愈能忠於自己
能夠做真正的自己，或多或少係因為唔再介意別人睇法，「年紀愈大愈容易做到唔理會別人睇法，老了先會明白無法討好所有人，生命上的選擇真的唔理得太多人。」
Sammi坦言過去曾遇到人生很大的困惑和難關，面對一些突如其來的問題，要做選擇時會聽到好多聲音，「人人對於發生在你身上的事都有唔同理解、答案同期望，期望我點樣處理，但無法理會太多，去到一些殺到埋身的問題，先會知道自己的真正選擇，先明白自己原來係咁樣的人，遇到咁樣的事會咁樣選擇。」
無論身邊有幾多唔同意見或者聲音去否定她的選擇，但Sammi決定忠於自己，「旁邊有幾多聲音都唔重要，因為最終只能聽一把聲音，就係自己的聲音，那就不介意別人對我的批評，或對我的選擇有咩睇法，因為生命必須忠於自己。」在那些時刻，Sammi深刻地感到真真正正做自己。至於點先知自己的選擇是對是錯呢？Sammi認為在當下往往無法知道，但當事過境遷後再度回望時，就會知道。
離別在所難免 最緊要係活得有意義
Sammi的爸爸和愛犬前年相繼離世，縱然明白活到依個年紀，必然要面對親友離世，但當事情真實發生時，Sammi話難免會有好多情緒，但幸好有信仰的幫助。
談到死亡，Sammi認為比起生命的長短，更重要係人生過成點，「我希望有意義地過，除了成功的時刻，都想有有意義的時刻、開心的時刻，人與人之間的共同回憶同關係。如果做到咁樣，對自己的人生無悔，我覺得離開係無問題，人人都要走。」