【50歲保養】Coffee林芊妤靠6招幫56歲媽咪大改造 回春成功變後生：就算年紀不輕都可以風韻猶存
Coffee林芊妤最近響IG同Youtube分享，點樣幫自己媽咪變靚，Coffee話媽咪只係得56歲，但係望落比同齡人老好多，於是佢開始為媽咪改造，經過一番努力，Coffee媽睇落終於似返本身個年紀！
Coffee話媽咪以前從來唔用護膚品，唔打扮亦唔化妝，皮膚完全零彈性。一開始Coffee媽好抗拒改變，不過響Coffee的鼓勵下都作出嘗試。不過Coffee強調，女士打扮唔係為取悅他人，而係為了令她自己開心，因為變漂亮，心情都會變好。佢希望令媽咪明白：「就算年紀不輕，也可以做一個風韻猶存的女人」。而佢就係用咗以下依6招成功改造媽咪，幫佢重拾青春！
Coffee媽咪大改造6招
1. 紋眉
Coffee認為眉毛好重要，因為考慮到媽咪未必會日日化妝，所以就帶佢去紋眉，因為紋眉後令人感覺眉清目秀，亦會散發妝感。Coffee話媽咪完成紋眉後，好多人讚佢靚咗後生咗，令媽咪愈來愈貪靚。
2. 做Facial
Coffee依幾年都有帶媽咪去做Facial，主要係針對皺紋、打斑、回復彈性。Coffee媽咪的皮膚以前缺乏彈性，但持續去做Facial後，斑點同皺紋都減淡了，皮膚有返彈性，感覺後生得多。
3. 做運動
除了外貌外，Coffee媽咪響努力運動下，身型上都有改變。Coffee媽咪會每晚慢跑一個鐘，有時又會跟住Coffee的影片去做簡單的燒脂運動。建立運動習慣之後，Coffee媽咪身型變得更均稱。
4. 改變髮型
Coffee相信髮型係會改變臉型，而臉型又會改變身型，所以髮型超級重要！Coffee帶媽咪電直頭髮、換造型，同埋染髮，不過佢建議唔好染得太淺色，因為顏色太淺反而顯得唔精神，佢認為染一些深色系的顏色，例如深啡色、深紅色或挑染，遮到白頭髮已經足夠。
5. 食保健品
由於Coffee媽咪長期有失眠問題，樣貌容易顯得衰老。食用保健品後，問題大大改善，夜晚輕鬆入睡，連帶黑眼圈都有明顯改善。人有充足睡眠加上心情好，就會容光煥發，睇落都更後生。
6. 改變心態
最後要改變的係心態，Coffee媽咪以前係好極為負能量的人，經常都會諗得好負面。Coffee話皺紋其實係表情紋，如果個人成日唔開心，表情紋都係向下，久而久之塊面就會愈來愈墮下去，所以佢希望媽咪可以保持開心，咁樣即使有皺紋，皺紋都係向上，笑起來都會靚。另外就係心態問題，唔可以成日覺得自己已經很老，覺得自己一把年紀就唔需要扮靚，或者咩都唔願意嘗試，其實只要心境保持年輕，諗住自己仲好後生、仲需要打扮，就會愈來愈靚。